【黑鏡線索】
一個地方係咪一個國際城市，最新嘅檢定標準，唔係乜嘢金融中心地位，而係就算政府幾廢，民間自發力量，班唔班得到口罩返嚟。香港明顯現象，係泛黃絲班到口罩返嚟嘅例子，完勝藍絲。點解？
首先，「班到口罩」，唔一定係口罩，係指好難搵到嘅物資。班到，有幾個層次，最高層次，最大量，係整出嚟。落一格，係攞到批發，萬萬聲咁攞到貨。再落一格，係經零售掃到一堆返嚟，畀親朋戚友。
火燒後欄 仲理北京狗？
生產、批發、零售掃，三層。每層做到嘅黃絲，都有唔少例子。建制呢？
777為首嘅特區政府，走去出tender，今日仲未截標，不如索性唔好出，話等市場力量自己搞掂好過，不特止，仲廢到問返大家知唔知邊度有得買，通知聲。
777政權廢，或者玩嘢，呢層冇意外，大家其實預咗。咁藍絲政黨呢？民建聯等等蛇齋餅糭一向最耍家，點解除咗出葡萄post之外，影都冇隻嘅喂（編按：新民黨有透視mask）？
一個可能，係佢哋選擇唔做。但係正值全香港人搵口罩，口罩貴重過任何蛇齋餅糭，而且啱啱先喺區選輸到趴街，過多幾個月就立法會大選，而家唔出招等幾時？
唯一可能，係佢哋想做但做唔到。佢哋一貫蛇齋餅糭類資金同貨源，都有上面提供同協調，阿爺會搞掂，佢哋掛個名負責派出去就得。簡單嚟講，係豢養動物，正常情況，跟主人指示叫乜做乜，冇問題。
但一旦遇到非正常情況，被包養嘅特性，即刻暴露晒出嚟，有如一隻日日被餵食嘅北京狗，忽然間俾人掟咗去森林一樣，呆咗企喺到。而家武漢肺炎，中国主人自己後欄都着晒火，仲邊得閒理你？
抗疫抗共最前線
香港抗疫，同時代革命，有好多共通點。中共話国家好強，人民生活好好，親共有着數，你信，就做順民，認中国做祖国。
即有如，中共話冇人傳人，你信，然後又話可防可控，你又信。到到中共都封晒城投晒降，你就企晒喺度。
相反，中共自我吹奏強国夢，你唔信，同中国劃清界線。777政權肆虐，你企出嚟反抗，向中国say no，堅持自己嘅香港，係自由世界陣營一員，係世界抗共最前線，搞民間外交，同其他命運共同體成員we connect，爭取歐美向中国施壓，同台灣連成一線。
即有如，中共話肺炎冇事，你早知到中国啲嘢，信佢一成雙目失明，嗱嗱臨上網買定口罩。當777中門大開，你撐醫護罷工撐封關。當疫情轉差，你已經同外國廠商we connect，攞到批發大批運返嚟，甚至買到設備自己生產。
一邊，係跟埋極權中国攬炒。另一邊，係同自由世界we connect，自己香港自己救。香港抗疫，係時代革命嘅一章。
撰文：宋漢生
fb : sunghsblog