的士同小巴業界噚日搞咗個「的士小巴抗疫大行動」啟動禮，喺全港12個專用石油氣站向業界司機派發「抗疫愛心包」，叫的士同小巴司機加強清潔抗疫。呢啲做show嘢，又點少得搵高官撐場，一則吸引傳媒，二則班官做吓show又可以當做咗嘢，結果運輸及房屋局局長陳帆帶住班官出席，但做show還做show，如果當局長做show做到要抹車，仲要做到叫辛苦，咁就比較難睇。
原來噚日活動其中一個環節，就係由嘉賓即場清潔的士車廂，陳帆亦要親自落場，八方見佢拎住水桶、抹布、膠手套，仲戴埋林鄭唔畀戴嘅口罩，自己落手落腳清潔一架的士，又要抹軚盤、車門、車頭等等。八方見陳帆個look，真係同的士司機有八、九分似，不過見佢清潔手法就似平日冇做開咁，成個過程只不過十分鐘左右，佢已經向在場記者講清潔車廂有「少少辛苦」，八方見到身為局長收幾十萬人工，都要抹車做show，唔知林鄭又會唔會效法呢？