朱栢康在電影《金都》內，飾演鄧麗欣的未婚夫，現實他卻經歷失婚，婚姻只維持兩、三年，他欷歔說︰「對方係台灣人，我都要經歷長時間，先可以走出離婚陰霾。嗰時拍咗3、4年拖，分開兩地，冇乜時間兩個人相處，空間大、距離遠，有拗撬都可以擺低，一結婚住埋就唔同。」
由結婚到離婚，朱栢康都是被動︰「你要結咪結囉。女仔比較執着，會話『就算明知離婚都要結。』以前嘅女朋友，就算關係唔係咁穩定都要結，我好衰咁同佢講：『既然同唔同我結都冇關係，你出去搵個同你結㗎啦。』我明點解嘅，好多女性覺得結婚係一個保障，但離婚有幾難，998元，離過婚會寫喺張結婚通知書上面，有底。」不過唯一堅持就是死不轉行，他笑笑口自言皆因「廢」︰「以前教表演，我同班學生講，要接觸唔同嘅人，唔好似我咁十幾年花晒喺藝術表演，冇其他生活技能，係『廢』。」