現年37歲的朱栢康，在娛圈有多重身份，他既是舞台劇演員，也是獨立樂隊朱凌凌的電結他手及主音，又參演電視劇和電影，今年他就以電影新人身份入圍香港電影金像獎最佳男主角。即使瓣數多多，但入行十多年的朱栢康，卻多次想轉行，最終因亡父的遺言及母親的支持，才令他繼續堅持銀色旅途。
朱栢康日前在觀塘接受《蘋果》訪問，身為舞台劇演員，他每字每句都字正腔圓。提到首部擔正的電影《金都》，去年獲提名台灣金馬獎最佳男主角，終不敵《陽光普照》的台灣藝人陳以文。朱栢康不諱言獎項的意義重大︰「功利主義啲講，我真係希望可以喺電影圈發展，一個獎項或者提名，會增加行內人對我嘅認識，可以攞到電影圈入場券。當然攞唔到攞到，好睇上天安排同評審cup of tea。」
沒有人生方向
除了演戲，朱栢康是獨立樂隊朱凌凌的電結他手及主音，成員還有他哥哥朱栢謙、凌智豪（白只）、楊偉倫及陳文進。他參演舞台劇，去年就贏得第28屆香港舞台劇獎最佳男主角（喜劇/鬧劇）獎。朱栢康直言讀書時很渾噩，不過演戲卻令他得到認同︰「讀書唔叻、運動唔叻、音樂唔叻，喺一個沙田區戲劇比賽攞咗個獎喎，頒獎畀我嗰位係《樹大招風》編劇龍文康。中六畢業都諗唔到可以做乜嘢，報讀Business Administration，聽都知唔啱我，冇耐就冇讀參加咗劇社，之後一齊報讀演藝，畢業做到𠵱家。」
入行十多年，朱栢康不止一次想過轉行，他慨嘆說︰「因為搵唔到食囉。做呢行都十幾年，托賴都算多演出經驗，但係要生活到真係好難。唔轉工嘅最大轉捩點係5、6年前爸爸生cancer。唯一好彩係爸爸公司出咗好多好多錢醫病。我就諗如果唔係咁，一個老人家要靠我哋兩兄弟嘅話，真係大鑊，我哋連家用都冇畀，嗰一刻真係好內疚。」
相信雙親眼光
父親重病時，兩父子多了傾心事，朱栢康提到轉行的念頭︰「同爸爸傾咗好多，想轉行做消防，但係爸爸阻止咗我，佢話『你𠵱家30、31歲，我係消防隊，請都請啲後生，你又唔係高學歷。』」爸爸這番話加上鼓勵，令他堅持到現在︰「爸爸仲話一生見過好多人，好少有人可以成為主角，而我擁有咁多機會，唔止人生成為主角，台上都可以成為主角，即使我懷疑自己能力，但係𠵱家發生緊嘅事，係話畀你知，你真係有咁嘅才能。」聽完父親人生中最後一段獨白，朱栢康雖感到迷茫，最終選擇相信︰「𠵱家諗返都想喊，兩父子好多時都係心照就算，好少咁傾。當初入讀演藝佢係反對，到今時今日搵嘅錢好少，但係佢臨死時講咗呢番說話，只可以相信爸爸眼光。」
朱栢康說收到金馬獎入圍通知前一個月，問媽媽︰「媽咪，我做到𠵱家幾努力都好，都係維持唔到生計，其實我係咪好冇天份。當然個仔喺媽咪眼中永遠都係最好，佢話『唔係啦！』」
撰文︰何永寧
攝影︰沈健程
服裝提供：Bally
化妝：Maggie Lee
髮型：Ginny of hairculture
