大美人鍾楚紅（紅姑）前日「登六」，連日來都低調相約朋友食飯慶祝60歲生日，噚日佢就喺微博貼出多張生日飯局相，分別同陳慧琳（Kelly）、蔡瀾、美指奚仲文等開心合照，又收到一大盆花，佢留言：「謝謝大家的祝福，今年的願望是祝願大家身體健康，平安。」
金繼手藝好
紅姑除咗獲Kelly慶祝生日，原來蘇施黃（阿蘇）都有份。阿蘇前晚喺facebook貼出同紅姑嘅合照，又有着住鬆身衫嘅紅姑見到生日蛋糕時，笑容燦爛地張開雙手擺甫士影相，甚有少女味。紅姑從來唔鍾意P圖，近年愛上行山嘅佢，分享嘅相都係素顏又簡樸，用最自然、最有自信嘅一面見大家。
紅姑近年學習日本「金繼」，阿蘇讚紅姑越來越叻，手工非常好，叫網民睇睇紅姑嘅手藝。金繼起源於日本15世紀，指以天然嘅塗漆將碟、杯或茶碗等破損嘅器物重新黏合，再喺裂縫塗上金粉重新整合。
阿蘇收手機
其實阿蘇為紅姑慶祝生日嘅同時，佢本身都係2月壽星，遲紅姑一日65歲生日（2月17日）。阿蘇前晚喺facebook留言：「今日係鍾記正日，不過我一樣有禮物收，我鍾意嗰幾嚿鮑魚係玉嚟㗎！」阿蘇又晒新手機，指係金燕玲送嘅生日禮物，佢話：「我決定今年18號才慶祝生日，因為2020年係一個新開始、新挑戰，是一個新生日，請大家18號才同我講生日快樂。」
撰文：馮仁昭