日本風月達人誠意推介大阪某拉麵店，說不但美味而且位於同志區邊緣，最宜餓基造訪北歐館後順腳醫肚，我多謝他關懷提點，但無奈附加「啱啱食咗兩次京都豬一，睇怕好難超越」。實話實說，我的味蕾一直停留在智障地帶，連便利店的一風堂杯麵也吃得雪雪有聲，偶爾倒冒起清醒時刻，譬如一蘭，試過一次從此敬謝不敏，遇上天賦異稟的曠世奇珍，亦知道執到寶，捧在手心怕吹掉，含在嘴裏怕溶掉。那間京都米芝蓮星星街坊麵屋，美譽甚囂塵上，因為怕人山人海，本來不打算幫襯，難得平日低調的黃姓舞林高手開金口，輕描淡寫的「去豬一食麵啦，但最好食唔係麵，係可跟麵嘅豆腐味噌撈飯」簡直力敵千鈞，上網搜索發現離住處不遠，諗住睇睇無妨，如果人龍見首不見尾，最多東家不吃吃西家。
嘩，一食鍾情啊！畫龍點睛的豆腐撈飯固然絕對極品，那碗白湯和牛麵也世間罕見，昆布任加唔嬲，吊味的幼絲柚子皮若隱若現，近年在東南亞發圍的阿夫利，鎮店之寶柚子湯雖然勝在香濃，相比之下有若土豪。意猶未盡，翌日想試黑湯叉燒，他們剛剛開了分店，我戲稱豬二，旅館走去只需五分鐘，但可惜豬二湯底不能任揀，只好重臨豬一。連續兩天光顧，多少有點尷尬，不過先一日我又冇雞手鴨腳打爛嘢，廚房樓面五虎將日理萬機閱人無數，應該不會認得，誰料一踏進門負責排位的哥哥就露出「乜又係你呀」表情，有限公司英語注入無限熱情。連cool到爆的靚仔主廚也金石為開，即時奉上溫暖笑容，有那麼幾秒，真的考慮過更改行程。