化學達人K Kwong嗅覺靈敏，因此最憎女人搽香水，他甫走進生哥的住所便覺不對勁，原來生哥事無大小出動滴露，甚至不加稀釋，直接倒在用過的口罩上，掛在窗口風乾，翌日再用。
生哥行年七十，解釋箇中因由：「因為自己係一位長期病患者，我已經九次全身麻醉，六次局部麻醉，邊樣都做過，個頭又揭過，心臟搭橋又做過，通波仔三次，心導管檢查三次。」手臂藏螺絲，胸口有鋼線，加上年事已高，自言「嗰頭近過呢頭」，故此奉行消毒主義，小心為上，「我希望滴露殺到菌，防止佢侵蝕我，因為我自己一個長期病患者，好容易侵蝕到。」
排隊輪罩全撲空
他的理念簡單明確，明知口罩只能防護四小時，仍然反覆使用四日以上，防菌殺毒任務交給藥水。妻兒經受不起氣味，全家只有他用這獨步單方，原來他的嗅覺隨着多次手術而去，不以為異，「𠵱家我個鼻冇嘢聞得到，所以我接受得到，我老婆、個仔接受唔到呢啲嘢，所以就係我用。」
本月初生哥撐着五勞七傷的身體，兩次去觀塘輪候口罩，都空手而回。轉戰美孚，有關方面派200個籌，本來戰況樂觀，可惜有人插隊，「我數吓數吓，百幾人啫，點都會有，點知排到我啱啱203，冇喇。」全家只剩11個口罩，個個彌足珍貴。家住石籬，邨內有確診個案，然而一罩難求，據他看樓下七個街坊五個沒戴口罩，「你話我夠唔夠膽出街？我個𡃁仔十幾日冇出過街，我老婆買餸先動用口罩。」
他本人也一星期足不出戶，「我哋升斗市民靠政府幫助，𠵱家我哋正所謂生不如死，同坐監有乜分別？小孩子隨時精神崩潰，我𠵱家（在南葵涌）都睇緊精神科。」生哥又說：「𠵱家你林鄭月娥，我哋特首、政府，點解我哋平民一啲支援都冇？有少少都可以啦，你𠵱家直情不聞不理，袖手旁觀。」他對阿娥的批評也就是你和我的心聲，「你銀紙有六千蚊畀到我哋，但點解一個口罩都畀唔到我哋？」
社區組織協會社區幹事吳衛東坦言對政府失望，私下向長者贈罩，「鄰近地區如澳門年初一開始保證每個市民都買到兩盒口罩，香港至今保證唔到供應量。」自家生產嗎，香港也落後幾條街，「香港無論公務員人數或資源都多過鄰近地區，點解確保唔到每個市民有足夠口罩供應量，特別係基層？」
K Kwong：恐吸入有害物質
吳衛東與K Kwong看罷生哥個案都直言心悒，後者不贊成用滴露醃口罩，第一不能確保藥水遍布每個角落，第二破壞中間濾網，第三藥水有毒性，昔年不時有債仔喝滴露自殺，可知厲害，生哥直接使用只怕吸入有害物質。K Kwong指滴露確能殺滅冠狀病毒，但1比19已足夠，要是堅持浸泡口罩，不管濾網受損，可以用1比99漂白水代替滴露。
正籌備生產口罩的他又說，熱水令口罩纖維收縮，改變濾網密度，阻隔飛沫效能成疑。只有口罩內藏紙巾管用，「可能個口罩四個鐘濕咗，隔咗紙巾，去到中間嗰層濕埋要六個鐘，即係延長兩個鐘壽命，但絕對唔可以延長一日。」