【本報訊】林鄭月娥患上「官狀廢炎」，病情危殆廢絕天下，令香港鬧口罩荒，一個難求。香港人只好靠自己，基層更加挖空心思翻叮，有政府外判清潔工用熱水泡兩次，口罩就這樣輪迴轉生。
天下第一高薪低能管治下，苦了百姓，有獨居婆婆用紙巾蘸酒精，隔在口罩與面頰之間，說是絕緣體亦可，謂之防火牆也行。甚至有長期病患者用滴露醃口罩，無所不用其極。
口罩滾兩滾，理據企唔穩，奉勸讀者別試，但上述現象反映阿娥令大家陷入絕望核心內圍，將用完即棄的事物循環再用。至於古法清蒸口罩，則要請教立法會衞生事務委員會主席Ann姐，要不要用蒸魚豉油。
撰文：陳勝藍
攝影：謝榮耀
外判清潔工：淥吓好過冇得戴
古有含笑半步釘，如今含淚兩盒thx？眼下情勢買一盒口罩也難，紅姐（化名）在政府設施擔任外判清潔工人，負責清理垃圾，經過一個上午勞累，口罩污穢理應更換，專家也指一次性外科口罩的最佳防護效能僅約四小時，但她家中只剩下寥寥幾個，至珍至貴，百般憐惜，只好用熱水洗禮，反覆使用，她說：「淥吓佢先得，唔淥吓除咗唔敢戴。」
不願出鏡的她解釋這獨門秘方：「淥兩次！淥一次，倒咗水，再淥一次，倒咗啲水，晾起佢，收乾佢，下晝要帶住佢執垃圾。」口罩來回熱水又折返面上，「執完垃圾，做咗一日，除咗佢掉咗佢，攞過個乾淨嘅戴住，收工搭車返嚟。返嚟又去街市買菜，買菜返嚟又除咗佢，用個碗裝住，煲壺滾水淥一次，倒咗啲水，再淋一次淥吓佢。」
冀政府一日派一罩
在家中晾起風乾，翌日上午工作全仗這個翻叮罩，她帶着濃烈鄉音地說：「聽朝要帶住開工，唔係點呀？就係咁喇，冇口罩用嘛！」紅姐剖析為何出此下策，「咁我諗住冇啦嘛，冇咪諗辦法慳啲囉，好過冇得戴啦。淥吓佢，聽日乾咗，有得戴好過冇得戴住出門口，係咪？」
有同事用清水洗濯口罩，卻怕病毒不死，不敢戴上，紅姐則相信熱水威力，「我認為淥死晒啲菌咪戴囉，我唔理咁多喇，淥死晒啲菌咪放心戴囉。我都唔知（滾水泡過）防唔防菌咯，總係我淥下佢，我個心話佢乾淨咯，死晒啲菌咯，咁囉！」
雖說是外判工人，總算替政府工作，當局理應派口罩給旗下員工，「有時叫大佬『冇口罩呀，畀個口罩用吓啦！』咪畀一個，有時畀兩個，我係攞過三幾個箒。」同事們卻沒揭竿起義，爭取口罩，紅姐還望政府開恩，「最少一日派一個口罩囉，一日派一個口罩最少㗎囉，唔係點啫？」
如非要上班、買菜，紅姐禁足街頭，以免消耗口罩，「開工就開工，買菜就買幾日（份量），買兩個節瓜，幾個薯仔，買兩斤菜，食兩、三日。」
一家三口蝸居舊區唐樓劏房，公餘時間呆坐家中，「坐下，行下，伸下，運動下囉，唔係點箒？反正日日做工都係咁運動。」
