【爆相爆片】樊少皇同賈曉晨（JJ）2016年結婚，婚後一年生咗囡囡「小飯兜」，由於樊少皇返內地拍戲搵食多年，所以兩公婆經常中港兩邊飛。早前《蘋果》讀者黎小姐透過「爆相爆片」分享，透露喺長洲見到樊少皇一家，遊山玩水好開心。
當日因為係閒日遊客唔算多，黎小姐喺下午4點幾，見到一個眼大大嘅男人，個樣都幾OK，望多兩望發現係樊少皇，佢身邊仲有老婆JJ同囡囡，同埋一位年紀比較大嘅女人。當時樊少皇一家三口喺天后廟對出個空地玩，已經兩歲嘅小飯兜，着住件幾搶眼嘅粉紅色衫仔周圍跑，手上仲拎住樽吹泡泡，玩得好開心。JJ就着咗件厚褸，大大隻嘅樊少皇完全唔怕凍，灰色tee加運動褲。
全程普通話
黎小姐話：「通常都係樊少皇同個女玩，JJ就負責推車仔同影相。當然樊少皇都有幫母女影相，但嗰位長輩，估計係JJ媽媽就較悶，有時會自己行開一邊休息。」黎小姐仲話樊少皇兩公婆同囡囡全程講普通話，玩到大約7點走。而經常喺社交網晒一家三口溫馨合照嘅JJ，日前亦有貼出同囡囡入長洲玩嘅合照，但就冇貼出一家三口嘅相。