「鑽石公主號」喺日本橫濱被隔離，上面嘅香港乘客一直話港府冇乜幫到佢哋。搞咗一輪，政府終於決定派包機接佢哋返香港，就喺呢個時候，一直話幫船上港人嘅民建聯立法會議員鄭泳舜，突然帶晒物資飛去日本，話要做支援，但好多網民都問，點解鄭泳舜上星期開記招關注事件嘅時候，唔立即飛去日本，而係知件事就快解決先去？
落機急見官員
仲有網民質疑，𠵱家日本政府封咗隻船，即使港府派包機接港人返嚟，好大機會由碼頭直接去機場，咁鄭泳舜又點見到港人支援呢？不過呢個唔重要，因為鄭泳舜一到日本，立即喺機場同中國駐日本大使館參事官兼總領事詹孔朝交流，話希望日本當局盡快為香港旅客進行病毒檢測，之後又見埋派去當地入境處人員同駐東京辦人員傾檢疫及包機安排，做晒呢啲工夫畀人睇，第日又可以有光環，話係自己成功爭取喇！