【本報訊】電台DJ森美的父母也是鑽石公主號的座上客，他昨日得悉美國已計劃派包機接走船上美國乘客，但香港政府依然「佛系」，「叫佢（港府）盡快啦，應該都做緊㗎啦（派出包機），我身邊都聽到好消息，應該下個禮拜啦，其實19、20號到佢哋隔離咗14日，喺間房裏邊，所以希望政府趕得切喺嗰段時間接佢哋返嚟」。
森美表示：「佢哋（父母）𠵱家喺船上等緊，三餐都OK，有廚房煮嘢畀佢哋食，有水同汽水，膳食方面係OK嘅。但有幾樣嘢比較麻煩，因為唔可以出去，只能留喺房，過去幾日只出過去一次，短短十幾分鐘上甲板後返嚟，加上間房冇露台冇窗，WiFi又唔太暢順，成日喺船入面悶到好似坐監咁。」
年過70歲的森美父母現時沒有任何病徵，森美希望日本政府可以加快檢疫，令沒有事的乘客可以離開返港隔離。
港乘客曾擬請願
森美指出：「佢哋有啲乘客想夾份，話叫香港政府出包機，又話請願，但噚（前）晚林鄭話會做呢件事，所以最後佢哋冇做到。」上周五有人向傳媒放風，聲稱港府會安排專機接走鑽石公主號的港人，結果並未兌現。
森美又無奈地表示：「希望香港政府早啲同日本方面交涉吓，船上面嘅檢疫方法好慢，希望可以周旋吓，有冇方法可以快啲，畀佢哋盡快離開隻船。」