北京昨突然宣佈張曉明燉冬菇，由全國政協副主席兼秘書長夏寶龍兼任國務院港澳事務辦公室主任，不少政界中人大感意外，連同之前的王志民，一手搞出反送中「大頭佛」的三人組有兩人已落鑊，只餘下特首林鄭月娥等候發落。
有政界中人指出，林鄭雖有習近平力撐，但明顯不代表「免死」，特別是林鄭抗疫不力引來的社會不滿升溫，「林鄭喺反送中犯錯唔使死，但抗疫失誤引爆民憤，恐怕連習近平都未必保得佢住」。
有政界中人指，不論是張曉明還是王志民，所有人都知道若沒中央甚至習近平「開綠燈」，他們怎敢就反送中問題隨便表態，「如果成功對付反送中示威，自然係習近平指揮有功，但𠵱家衰咗、區議會選舉又大敗，唔通習近平負責咩，梗係下面孭鑊！」林鄭早前述職後仍聲稱獲習近平全面支持，「因為未到時間郁佢，習近平梗係支持佢，但時辰一到亦可以立即換走林鄭」。
習需穩定局勢挽經濟
有專業界人士更相信，習近平近日下令中國全面復工，明顯北京面對強大經濟下行壓力，穩定經濟是重中之重，香港是中國經濟吸納資本的重要窗口，香港抗疫不容有失之餘，更需穩定香港局勢以免影響中國經濟，但林鄭在抗疫問題上再引發民憤，隨時觸發新一輪全民抗爭，「喺呢個大前提下，即使習想保林鄭，但抗疫失誤、引發民憤、經濟受挫，咁嘅情況下恐怕習唔會保佢，好似對張曉明、王志民一樣咁踢佢走」。