曼聯啱啱喺西班牙馬貝拉島進行完歇冬集訓,相信一眾魔兵都鬆晒,可以返英國專心備戰下場鬥車路士嘅英超大戰。不過有傳媒揭發,佢哋喺馬貝拉島曾經換過酒店,原因係原本打算入住嘅酒店喺紅魔到埗前幾日,曾經被由賓尼迪斯帶領嘅中超球隊大連人(前名大連一方)住過,曼聯好可能驚感染到喺中國爆發嘅新型冠狀病毒,所以決定即時轉竇!
恩哈路獨操地點近曼城
話說紅魔原定入住威斯汀拉昆達高爾夫水療度假酒店,但到咗西班牙後,先知道原來大連人嘅職球員曾喺一個禮拜前,住過呢間酒店進行中超季前熱身。紅魔職球員知道後大驚,即刻改住附近嘅五星級酒店,明顯曼聯係怕咗目前喺中國大規模爆發嘅武漢肺炎,擔心即使大連人已經離開咗酒店,都怕對方用過嘅設施,可能會令佢哋受感染。
其實曼聯可以話對武漢肺炎嘅防禦措施相當熟悉,事關佢哋從中超上海申花借入嘅前鋒恩哈路,已要留英隔離14日而冇得去西班牙集訓,呢位尼日利亞前鋒甚至連球隊嘅卡靈頓訓練基地都唔去得,只可留喺佢目前入住嘅羅利酒店,同埋附近嘅英國跆拳道中心做個人操練。有英媒發現呢個跆拳道中心,其實同曼城嘅伊蒂哈德航空球場只係相距480米,腳程六分鐘就到,曼聯將恩哈路擺咁近宿敵,唔知係咪別有用心呢?
馬迪私會「大連人」咸錫
不過,曼聯就算幾努力防範,最終都可能功虧一簣,事關球隊中場尼曼查馬迪曳曳,竟然趁呢段時間同大連人教練團成員、前南斯拉夫同胞達高馬迪,仲有效力該隊嘅斯洛伐克國腳咸錫短聚,話晒人哋都係中國嚟,唔知有冇感染病毒喺身㗎嘛,萬一馬迪惹到再傳染畀隊友就麻煩囉!唔知佢會唔會俾球會「照肺」呢?
目前武漢肺炎的確令世界各地人心惶惶,中國已因肺炎變成疫區,唔少喺當地搞嘅體育賽事都要延期或取消,而世盃亞洲區外圍賽第二圈下月尾將重燃戰火,國足都幾難喺主場鬥馬爾代夫,不過泰國足總就幫拖,話同意借出泰超球隊武里南聯嘅主場畀中國踢呢場外圍賽,家陣只需通過泰國嘅旅遊局同衞生部門批核就得,似乎泰仔唔多怕喎!