康復香港，時代抗疫，相信係香港人一致想法。《蘋果》副社長陳沛敏收到「影攝食」來信同三幅手畫漫畫，獄中手足想同全港醫護講，「辛苦啦！沒有醫護為香港抗疫，香港一早社區爆發！」影攝食雖然喺高牆之內，但都想盡一點綿力支持醫護，託朋友替醫護訂咗少量口罩，希望幫到佢哋。
監獄用過期口罩
身在赤柱嘅影攝食同《蘋果》反映，囚友望住武漢肺炎確診數字喺中國飆升，大家都好質疑「究竟個政府在做甚麼」，點解死不封關。影攝食本人都病咗，由大年初一病到初八先好返晒，好多囚友都擔心監獄會出現武漢肺炎個案，原因係懲教職員係獄中當值嗰陣，原來唔係個個都戴口罩，最令人擔心嘅係，懲教職員休假嗰陣唔知有冇去過疫區！八方向懲教職員打聽過，原來懲教處雖然有生產口罩，不過都係提供畀物流署再畀其他政府部門，懲教自己都係用存貨，仲有部份監獄甚至用緊過期口罩。
如果連生產嘅部門都冇，咁到底CSI口罩去晒邊？政府到今日都仲係冇好好交代，對唔住香港納稅人之餘，仲對唔住一班公務員！