透視口罩，禾真係見過！八方講緊咩？咪就係新民黨葉劉淑儀前日送出嘅超薄口罩。事緣葉太近日收到新民黨中委王聰德父子捐贈「一批來自日本的口罩」，「質素不錯」，會將呢批口罩派畀老人院公公婆婆。解人一罩之困，好事當然要公諸於fb。
fb河蟹「日本口罩」
可惜好多街坊拎完口罩之後都大表失望，皆因口罩呈半透明，猶如喱士，戴上面都隱隱透視膚色，好多網民質疑「薄到冇功能，戴三個都嫌薄」。所謂禍不單行，有網民發現葉劉呢盒綠色口罩，疑似唔係日本貨，而係淘寶價六蚊人仔50個，由產地湖北直送，快遞有貨。
咁嘅形勢下，葉劉可能見勢色不對，噚日靜靜雞改咗fb個po，將「日本口罩」同「質量不錯」兩大承諾撤回，改稱「一批口罩」。有傳媒打畀葉劉問吓發生咗咩事，葉劉就話派畀街坊嗰陣有講明材質較薄，「唔嫌棄先好攞」，言下之意就係拎咗唔好怨。葉劉仲補充，香港各界缺罩，搵到靚貨如N95，會優先畀醫院，口罩「有好過冇」。有網民就話，唔係嫌唔嫌棄嘅問題，而係薄到咁，分分鐘害到老人家，好事變壞事！
李八方