香港眾志前日公佈喺國際戰線支援下，成功班到十萬個口罩畀港人，噚晚喺眾志網店開售，點知未開賣已經有大批市民入去網店，搞到不勝負荷要開後備網站，到正式開賣就直情係秒殺，唔使一陣就全部沽清（圖）。
反應熱烈 系統冧檔
眾志喺fb發貼話，希望今次安排可以協助緩解港人對口罩嘅急切需求，佢哋知好多朋友今次未能成功買到，亦有好多市民同團體對佢哋發售方式提出建議，未能及時回應表示歉意，佢哋亦留意到付款系統出現嚴重超載，所以要檢查系統狀況同核對購買者資料，提醒市民佢哋會向成功購買口罩嘅人發送email以作確認，希望市民耐心等候。
好多市民留言話，雖然買唔到，但都多謝眾志幫港人，亦有人留言話付款嗰陣收咗幾次錢，希望眾志跟進，但整體上大家都好理解，連港府都搞唔掂，要小小一個香港眾志搞成十萬個口罩網購，難免係「做法唔完美、可接受，但要改善」。
另外，今次眾志賣口罩有三個價，分別係98蚊一盒，由眾志補貼運費，減輕有需要人士負擔；128蚊一盒就由購買者分擔運費，等眾志繼續有足夠資源搜羅防疫物資；仲有$258蚊一盒，收益扣除成本後捐去醫管局員工陣線成立嘅「武漢肺炎防疫抗爭基金」。