曼聯過去幾年不斷使錢擴軍，不過始終未能回復昔日嘅成績，連帶收入都有所影響。球會短期內未必做到「節流」，惟有喺「開源」方面諗諗計，據英國傳媒透露紅魔就打算喺奧脫福球場增設1,500個企位，令球場可以吸引更多觀眾入場，最快會喺今季內進行測試。
據報曼聯早於上年12月已經向當地嘅政府部門申請，喺奧脫福嘅東北區看台加裝1,500個設有護欄同摺椅嘅「安全企位」，畀球迷可以企喺度睇波。報道仲透露有部份買咗曼聯季票嘅球迷已經收到通知，有機會今季之內進行測試㖭。
狼隊率先改建企位
其實唔少英國球場喺好耐之前都設有企位，不過自從1989年發生「希斯堡慘劇」，導致96名利物浦球迷喪生之後，英格蘭足總就開始禁止國內最高兩個級別聯賽嘅球場設置企位。不過經過多支英超球會近年極力爭取之後，有關命令近期已開始獲得解禁，容許球場設置有護欄同摺椅等安全措施嘅企位。
另一支英超球會狼隊喺上個月已經率先喺摩連納斯球場改建小量企位，而熱刺嘅新白鹿徑球場喺重建嗰陣亦都預留咗7,500個座位，準備隨時改建成企位。有由曼聯球迷組成嘅關注組織就對球會今次申請改建企位表示支持，仲話希望將來可以將安全企位擴展到奧脫福其他看台咁話，似乎英國球迷都係鍾意企喺度睇波喎。
普捷天奴會曼聯顧問
不過球場改建得幾有氣氛都好，球隊嘅成績始終先係最重要嘅，曼聯今季嘅成績肯定係球迷期望之下，踢到家陣都只係排英超第八位，相信下一季「大執位」嘅機會都幾大。喺星期二賓福特對列斯聯嘅英冠賽事中，有人就捕捉到前熱刺領隊普捷天奴同曼聯副主席活華特嘅公關顧問艾斯頓同場睇波，雖然兩人冇交談兼且座位都隔開咗幾行，不過仍然令外界猜測「肥普」會唔會接替蘇斯克查出任下任紅魔領隊，蘇B真係要醒醒定定嘞。
蘇B有壓力，佢麾下嘅保羅普巴同樣都有離隊壓力，現時喺杜拜養緊傷嘅普巴喺社交網站上載咗汽水廣告短片，不過就俾球迷留言話佢養傷期間仲拍廣告，擺明個心唔係喺曼聯度咁話。普巴到下年就會同曼聯約滿，有傳佢有意今年就離隊，佢呢幾年一直俾球迷咁鬧法，想走都正常嘅。