十年前，龐一鳴推動消費者抗爭，杯葛地產霸權，被不少人笑脫離現實。十年後的今天，形勢大逆轉，不少人將抗爭融入消費；光顧「黃店」，是每天指定動作。
對於大家對黃色經濟圈的投入度，龐一鳴形容是「夠儍」，但要壯大黃圈，這位香港消費者運動先鋒認為大家尚有不足。
撰文：羅慧茵 攝影：黃奕聰
46歲的自由工作者龐一鳴，一直推動不少社區運動，有份創辦支持本地生產的組織「田嘢」及「港嘢」、籌辦海外賣藝活動「一打人去賣藝」等，亦分別於2012年及2015年參選立法會及區議會，惜最終落選。
「離地」忽然變貼地
龐一鳴最為人熟悉的，是2010年發起「一年唔幫襯地產商」行動，於日常生活杯葛大地產商旗下的商店，包括拒絕光顧連鎖快餐店、以單車代步、堅拒巴士、港鐵，不幫襯固網寬頻等，行動很快獲不少傳媒報道、市民支持。龐將個人行動再擴展為集體行動，呼籲公眾以加入對抗地產霸權。
行動引起不少迴響，但推動消費者抗爭的過程中，龐一鳴不時被人揶揄脫離現實：「唔通你唔用電力咩？唔通唔用煤氣咩？呢啲全部都係地產商服務！」甚至當龐一鳴與其他人發起「唔幫襯大地產商的聖誕節」，呼籲大家遠離商場，改到小店買禮物，也有人「潑冷水」，「咁你造埋量有幾多？咪又係十萬百萬嘅嘢，你幫到啲咩？」
龐一鳴形容，當年那群認為抗爭無用的人，是一班「已經認輸嘅人」。然而，經歷過雨傘運動、反送中運動，10年後的今天，社會氣氛大大改變，越來越多香港人發現自己也是被欺壓的一群，於是覺醒，「要一步登天係冇可能，全部嘢都係揼石仔咁出嚟」，不再如以往般質疑行動有沒有用，反而「做得幾多得幾多」，「黃色經濟圈」的運動因而誕生——大家矢志於日常消費中抗爭。
本地生產去中國化
龐一鳴當然支持黃色經濟圈，但認為現時行動較局限於「消費圈」，忽略「本地生產」。「𠵱家係一個黃色『消費圈』多啲，特別係消費飲食業層面，遠遠未有任何經濟規模，因為當中完全冇本地生產。」
缺乏本地生產，市民安危亦會受影響。武漢肺炎疫情蔓延，香港市民從世界各地搶購口罩，龐一鳴認為正正反映本港生產不足，「冇咗呢個生產，遇到危機時，出現短缺同恐慌，生產影響安全，唔止生活用品，甚至安危自主。」
「即係話我哋嘅日用品，全部係外地生產，都係一啲大集團嘅資金、紅色資本、藍色資本擁有，其實冇一個黃色經濟圈誕生。所以，一定要由源頭着手創造、生產我哋需要。」如何做？「所謂本地生產，唔一定喺香港實體土地」，龐一鳴大膽建議，由香港人發動，在外地設廠，專門供應香港。
龐一鳴一直着力推廣香港製造，他曾於「田嘢」的實體小店推廣本地有機菜，但因價格略高，不少街坊被嚇怕，還反嗆：「搶錢呀？食咗識飛呀？」龐一鳴不急着硬銷，選擇以例子說服顧客，「我同佢講其實（本地有機菜）其中一個主要客源，係癌症康復者，然後佢哋即刻個樣已經有啲唔同，因為大家即刻明，瀨過嘢，健康出事，食嘢嘅時候真係知道分別，咁嗰啲人好肯買」。誰料到現時因疫情蔓延，突然又多了市民購買本地菜，龐一鳴說，大家終於重視本地農產。
個人要支持本地製造，亦都不難。龐一鳴從隨身袋子取出幾份「本土製造」禮物，是他在剛過去的農曆新年，打算送給親友的「賀年禮品」——有馬鞍山麵包店自家製的角仔、本地回收廠喵坊回收紙漿所造的再造廁紙；他還帶記者到觀塘工廈，領取他預訂了、由本地農夫種植高麗菜及木瓜，與家人享用。龐一鳴如他以往推廣小店產品一樣，呼籲大家送禮時考慮本地製品，讓親友體驗「黃色經濟圈」。
派無間道深入敵陣
除了消費上的杯葛行動，龐一鳴認為，大家在中資機構、紀律部隊等，都要派駐「自己人」，深入敵陣，探取情報。「真係有作戰意識時候，你一定係做卧底！」又例如承辦特許經營便利店或食肆，在日常營運中做「無間道」，聘用手足。就算是個一般消費者，亦可深入藍店，「潛移默化」影響對方。
「我唔會刻意去搜尋，係咪黃店先去幫襯。」龐一鳴相信，這樣反而有機會接觸藍店人士。「我試過去完集會，全身黑，走入去觀塘區粥舖食嘢，咁你嘅存在話畀佢聽，『有啲客仔去支持緊呢個運動』」，店員一邊看着電視直播，一邊指摘學生「又出嚟搞事」，龐一鳴乘機搭訕，「講返畀佢聽，社會情況係咁樣喎，所以啲學生好自然會去表達」。
店員難道沒有跟你互罵？「佢哋又唔會同你吵，講真，因為粥舖係街坊生意，又見你幫襯開，你今日半gear走入嚟，又好客氣咁講嘢，佢始終會溫和啲。」
有人認為與藍店溝通是「嘥氣」，龐一鳴稱，他不期望對方即時「藍變黃」，但他始終相信溝通。自發起「唔幫襯地產商」運動起，他一直堅信社會需要不同表達方式，例如他仍然會耐心向別人解釋，其實由觀塘去佐敦，踩單車與坐港鐵所需時間其實差不多，又會舉辦分享會分享抗爭經驗，「如果你一放棄咗溝通，你個（運動）人口係唔會增長」；他亦不擔心人身安全，「我會選擇純粹講道理，唔係用情感語言發洩。」
黃色經濟圈運動中，大家都不想光顧「偽黃店」——即表面上支持五大訴求，骨子裏支持政府甚至警察的商家。但每人對「真黃/偽黃」定義或闊或窄，有人認為只要店面張貼反送中標語即可，但有人要考究老闆本人是黃是藍，甚至來貨，也不要「中國製造」。
龐一鳴卻認為，批評者不應只停留於投訴「黃店」產品來自內地，反而該「行前多步」，向商家介紹其他來源的貨品，促使黃店「良性改良」。亦有人批評某些黃店食肆「難食」，但為支持同路人，惟有勉為其難光顧。「唔掂㗎咁樣！」他直言，「嗰間小店，但係唔好食、產品唔好，理由因為反地產霸權或支持黃色經濟圈就去幫襯，呢個係會俾人笑嘅一件事。你自己唔笑自己，成個世界都會笑你，因為你係本末倒置。」
質素口碑 延續運動最大要訣
龐一鳴當年推廣小店會以質素為本，會有義工先訪問小店以作了解，推廣前亦會先試用產品，「質素其實好重要 ，雖然佢係小店，但質素唔好，介紹完仲衰。」現在黃色經濟圈規模大得多，他提議消費者幫助黃店改善經營，如提議改善入貨，甚至請其他廚師培訓黃店員工。
對於「真黃偽黃」爭議，龐一鳴建議做跟進工作，例如製作表格，查詢各店的立場或願意支持運動的程度，如支持五大訴求、撥出利潤支持行動者，讓商戶有機會表達，「畀返空間社會唔同嘅人行前多步，而唔係純粹話定位黃藍，that's the end。其實消費者運動有好重要嘅一點，你必須要畀一啲你批評嘅店舖或品牌進步嘅空間。」
在龐一鳴眼中，能令消費者運動持久的另一工具，就是「數據」。「士氣係好重要」，龐一鳴特別強調，數據能收鼓勵及阻嚇效用，鼓勵市民持續發力。但要取得藍店或其他官方數據，或有一定難度？「冇數據，我哋就自己創造一啲數據出嚟，我哋做research（研究）！」
反送中運動以來，抗爭者呼籲公眾罷搭港鐵，選擇其他公共交通工具，包括渡輪。龐一鳴出入多會踩單車及乘搭渡輪，他曾化身「數據收集師」，到觀塘碼頭收集至北角渡輪線的乘客量的數據。
「呢個我有做一啲數，真係走去觀塘碼頭，睇佢本記錄簿，記錄每班船有幾多人、每日有幾多人搭，我專登去睇6月前6月後，數據上增長我相信最少有20%。」
龐一鳴認為，對比起杯葛地產商運動年代，「大家係已經去到夠儍呀，願意去排隊，例如最近『和你宵』，真係個幾兩個鐘都願意排。」既然人夠儍，又夠多，不如輪班到藍店前當值，記錄顧客流量，「輪流去睇藍店，成個月輪流做義工，數佢生意係點樣，能夠創造鼓舞嘅訊息畀大家。同時，數據係有鼓勵同阻嚇兩方面力量，如果其他藍店睇到，佢心知肚明。」
後記：如何堅持？
不少人擔心，隨着抗爭熱度減退，一般人或許會回到昔日的生活模式，「黃色經濟圈」恐未能持之以恒。
龐一鳴的「唔幫襯地產商」行動已經堅持足足十年。時至今日，如非必要他都罷坐港鐵，以單車代步。
當年不少人質疑，像他這樣的人才能堅持這種行動，「就係你唔係做全職咪得囉，冇兒冇女冇結婚咪得囉，唔使去照顧高堂咪得囉……如果有份固定工作或者要照顧家庭，已經唔使做啦！」如今眼見同路人越來越多，這個過來人覺得，已經是最好的回應。
「每一個人都可以有呢個選擇，都可以做到呢樣嘢。」