利物浦喺英超榜首遙遙領先，相信其他球隊今季都好難追到佢，不過紅軍今季可唔可以首奪英超，最大對手唔係曼城，而係武漢肺炎，有球迷就擔心疫情問題會影響今季英超賽程，令球季冇辦法完成。
武漢肺炎疫情席捲全世界多個國家，就連遠至歐洲嘅英國都無法倖免，近日確診個案越來越多，雖然利物浦市表明會支持同協助當地嘅華人社區，不過有利物浦大學（圖）嘅華人學生就透露自己俾當地人歧視搞到唔敢出街，總之無論當地嘅英國人定華人都係人心惶惶。
雖然利物浦今季喺英超已經拋離晒其他球隊，不過隨住當地疫情嘅發展，有球迷就開始擔心紅軍今季係咪可以順利咁首奪英超。有球迷就話，好擔心英國疫情爆發，最終會令到好似英超呢類大型公眾活動被迫暫停，如果係咁嘅話，賽會點樣決定今屆冠軍球隊將會成為一個問題；亦有球迷話估唔到紅軍今季最大嘅爭標對手竟然係武漢肺炎咁話。
今季英超會唔會因為武漢肺炎而腰斬仲係言之尚早，不過另一支英超球隊曼聯早前就已經決定重新檢視今年夏天嘅季前集訓係咪照原定喺中國舉行。