特首林鄭月娥話同港人撲口罩，結果撲唔到之餘仲要開口叫市民如果知邊度有貨，就通知政府，被網民恥笑乜唔係背靠祖國就得咩？有連登仔上月底就一度出po，題為「如果呢個時候之鋒deal到啲口罩返嚟，落唔落到港共面？」之鋒睇到就用咗個戚眉emoji公仔喺facebook回應，點知之鋒真係撲到100,000個口罩畀香港人，仲要係由美國空運返香港！
之鋒噚日下晝係fb出po，佢企喺一個裝滿口罩嘅貨櫃內，宣佈眾志成功從美國採購10萬個口罩，並已安全到埗兼順利清關，佢剛到機場攞貨！之鋒話，喺中國商人持續炒賣口罩下，港人採購口罩嘅工作可謂相當艱難，好在佢過去數年做過好多國際游說工作，喺美國累積唔少有用連結，眾志已用咗唔少時間查證生產商品牌，確保有實際防疫功用，同時以最短時間將所需款項電匯到美國，阻止大陸用即時現金交易「搶單」。
由於近期飛嚟香港嘅航班大幅減少，貨櫃一位難求，眾志最終需要比平時多付3至4倍嘅價錢，先有航空公司願意承運呢批口罩，認為今次成功入貨，反映黃色陣營嘅國際戰線一樣為香港人做到嘢！佢又感激Hong Kong Democracy Council US、New Yorkers Supporting Hong Kong等組織，以及一眾喺紐約嘅港人熱心幫忙，先能夠將大批口罩運抵香港！
之鋒預告，今次部份口罩將交由友好民主派區議員協助社區有需要人士，尤其係基層、清潔工人同長者，其餘就會喺眾志網店（ https://www.demosisto.hk/shop/onlineshop.php?lang=zh ）以低於成本價發售，叫大家留意眾志短期內嘅公佈喎。