熱刺球星迪利阿里日前偷拍一個亞裔男子，嘲笑中國人係武漢肺炎爆發嘅源頭，仲將條片上埋Snapchat，即刻惹嚟猛烈批評。雖然佢已經即刻刪咗條片，又拍過另一條片道歉，但英足總已經寫信畀佢了解事件，仲話唔排除會罰佢停賽。
阿里因為條片打碎強國人玻璃心而被譴責，佢效力嘅球會熱刺亦特別提醒佢，唔好忘記自己嘅足球員身份。英足總𠵱家就話會研究阿里有冇涉及種族歧視行為，同埋片段係咪含有攻擊性言論，但佢哋都會考慮埋呢啲內容，係咪只係畀人消遣同娛樂。不過，英足總近年對涉及種族歧視行為嘅執法都幾嚴，好似曼城嘅葡萄牙中場貝拿度施華，上年九月就因為喺社交網站貪得意將隊友班捷文文迪細個嗰陣嘅相，同一個朱古力造型嘅糖果品牌吉祥物比對，結果就俾足總罰停賽一場。
曼聯擬轉赴美洲掘金
阿里嘅行為當然唔可取，但武漢肺炎又的的確確係由中國對外擴散，𠵱家就連近年成日都趁休季訪華掘金嘅曼聯都話怕怕，諗住擱置今夏嘅亞洲之旅。消息人士指，曼聯原本計劃嘅亞洲之行，主要都係去中國，希望藉住一系列季前熱身賽，喺北京、上海同瀋陽等地推廣以球會作主題、準備年尾正式開張嘅娛樂中心，但受到疫情影響，紅魔將會重新審視行程。有報道就話假如疫情持續，佢哋嘅Plan B就係改去美洲踢熱身賽。
大簡返意話唔怕武肺
呢場武漢肺炎搞到人心惶惶，中超賽事亦都宣佈延期，廣州恒大就喺2月5號開始畀球員放假，直到23號先去杜拜進行訓練，但𠵱家身在意大利嘅恒大教練簡拿華路就揚言，唔太擔心疫情會惡化。「大簡」強調，今次拉隊去杜拜集訓，並唔係驚咗返中國，而係因為中東地區天氣暖啲，有利備戰。佢又話只要跟足醫生嘅吩咐戴口罩，勤啲洗手，同埋定期量體溫就已經好穩陣，佢仲話自己已經做好準備返中國，亦相信疫情好快就會受控。