「兩盒Thx！」武漢肺炎疫情蔓延，香港人出盡辦法狂搶口罩。城中都有唔少口罩怪談，蔣麗芸清蒸口罩就係其一。不過最近民主派區議員遇到怪人怪事，就係有一個同名同姓既「鄭麗華」，向多個區議員要求提供口罩。奇在乜？就係呢位鄭小姐自稱係東頭、南屏、慈佑、水邊、錦繡花園、天恒、康怡、翠德區嘅選民，仲向相關區議員話「上次選舉有支持你」，唔通今次疫情令呢班影子選民都現形搶口罩？
被點名求罩嘅錦繡花園區議員杜嘉倫就將呢件事放咗上fb，點知唔同區嘅議員都紛紛將相同經歷分享，驚嘆原來呢位鄭街坊係「大家的街坊」，區區都有票，大家笑問「點解佢張身份證可以係18區登記做選民」，仲講笑呢單case使唔使舉報種票。八方都喺度提醒香港人，好多page最近都叫人like and share就可以抽口罩，其實只係儲like然後將成個page賣博出位；好似鄭街坊呢類不明來歷嘅求罩，其實可能係呃口罩然後賣出去，一定要提高警覺！