《上流寄生族》榮獲四項金像獎，港報娛樂版謂「平了當年李安《臥虎藏龍》紀錄」，真是唔知嬲好定笑好。別誤會，我無意低貶葉錦添、譚盾和鮑德熹各位大哥哥的個人成就（但是必須鄭重指出，唔計風水命理等等潛伏神秘因素，作為名字「鮑起鳴」鏗鏘有型得多），同樣千里迢迢跑到美國掃獎，人家南韓這部落袋的是史無前例的兩個最佳影片，另加最佳導演和最佳原創劇本，氣勢如虹鋒頭無兩，白鴿眼講句，奧斯卡縱無輕於鴻毛，肯定有重於泰山，點有得比呀？搞到連神婆都跌咗少少眼鏡噃，所謂失身事小失手事大，你以為好稀鬆平常咩，好心唔好再滾搞早就上咗岸嘅李導，搬佢出嚟做陪襯品啦。
近排忙於為口罩四處奔波的谷友，在此歷史時刻紛紛停下腳步，暫時忘記口水有毒，以打邊爐姿態圍繞新貴奉俊昊七嘴八舌。一個說，假如《1917》得最佳影片，先至叫冇天理，另一個表示《上流寄生族》獲最佳國際長片雖然不完美但可接受，擸埋最佳影片及最佳導演兩項至尊大獎就好過份。問到我，我話最佳影片投硬《從前，有個荷里活》，甚至最佳女配角，也寧願分畀該片的翻生莎朗蒂，都唔益有教壞後輩之弊的《婚姻故事》浮誇大律師──神婆不客氣指她「飆高音」，我直頭覺得有兩刻高到走音，鐵了心非頒畀壽星女羅娜丹不可，點解唔派《小婦人》的慈悲師奶做代表？講到底，唯一肉緊的是同聲同氣的《萬千痛愛在一身》，不過世事便是這樣，稍嫌平庸的《論盡我阿媽》戰無不勝，論盡我自己則只好陪寄生族讀書。