特首林鄭月娥話喺中央協調下，真金白銀買入1,700萬個口罩，結果引起內地一班憤青小粉紅嘈到拆天，話點解要幫香港人，但今次抗武漢肺炎，香港又捐咗幾多錢畀大陸？根據中聯辦出稿，原來一班商家、富豪、乜嘢港區人大政協夾埋捐咗10億畀大陸抗疫，當中仲包括曾俾香港左派抹黑做「曱甴王」嘅超人李嘉誠。
其他富豪未見救港行動
西環話截至2月10日，香港各界夾夾埋埋合共捐咗超過10億人仔同口罩等畀大陸抗疫，其中超人名下嘅李嘉誠基金會捐咗一億，超人就真係協助抗疫不分中港，之前曾以銀彈支援本港中小企，旗下屈臣氏又不停返口罩賣畀香港人。李嘉誠基金會發言人話，原計劃將捐款連同醫護物資一併發放，但因籌措同組織物資運送具挑戰性，所以決定捐款先行，物資隨後補上，基金會又講明會支援埋香港醫護抗疫，正盡一切努力係全球搜尋醫護物資，期望盡快為香港醫護人員紓解燃眉之急喎。
至於其他有份畀西環表揚捐錢嘅富豪，八方左睇右睇，唔係好覺佢哋有乜公開行動，捐助過香港人抗疫或搵口罩，好似捐3,000萬元嘅世茂房地產、捐1,000萬嘅恒基李家傑同李家誠、捐1,000萬人仔嘅新世界中國地產行政主席鄭志剛、同埋以嘉華集團名義捐2,000萬嘅呂耀東咁，見佢哋對大陸同胞咁有同情心，唔知佢哋又有冇私下捐錢幫吓香港人抗疫、又或入返多少口罩派畀香港人呢？如果有就應該講吓，事關今時今日好多香港人，特別係低下層排通宵都係為一盒口罩，好多黃店小企都幫香港人，唔通呢排富豪有北京、西環表揚先會幫？
李八方