醫管局（HA）得返一個月口罩存貨，好多人擔心醫護唔夠裝備會受感染。不過少數派最大黨民建聯就唔係咁睇，連續兩日喺facebook出文，質疑HA口罩消耗太快，似乎想暗示醫護亂用口罩。好多市民、醫護睇到一肚氣，不斷留言鬧爆，噚日有人仲喺醫護專頁HA Secrets留言大反擊，指醫護唔似得民建聯咁可以home office，高風險病房嘅醫護要頻頻換口罩，保障自己同病人。有網友怕層次太高對方未必明，舉咗個幾生動既例子，「醫生姑娘接觸完前一個高度疑似病人，戴返同一個罩同一set裝備幫你割瘜肉好無？」諷刺民建聯前主席譚耀宗曾被踢爆喺伊利沙伯醫院打尖割瘜肉。
身兼區議員嘅鄺葆賢醫生亦寫文炮轟民建聯無知，詳細列出要照顧一個疑似武漢肺炎病人，最少要用16套保護衣連面罩口罩，如果病人要抽血照X光就要用更多，而至今已經有過千宗懷疑個案。其實醫院嘅口罩除咗畀醫護，仲要畀住院病人、外判保安員、清潔同埋病房助理等等，全部有數得計。八方覺得禮義廉咁鍾意計數，點解唔幫手計吓政府嘅CSI口罩去晒邊？Popo又用幾多口罩呢？