「沖廁時，請蓋上廁板，以減少細菌傳播」，武漢肺炎肆虐，防疫成了港人頭號大事，搶口罩、勤洗手，公廁都貼上溫馨提示，人稱「廁所博士」的熊志權，大抵最感觸。2003年沙士掀起一場公共衞生風暴，U型排水口被指成散毒元凶，觸發他與一眾熱心的廁所專家成立「香港廁所協會」，不但自掏腰包參加國際會議，發表涉公廁設施與衞生的學術論文，更親身巡視公廁，查找衞生情況，無懼惡臭公廁「遍地黃金」，選出全港最差／最佳公廁。「皇帝都要去廁所，無論你幾有錢定幾窮，人人都一樣要去方便」。
記者：呂麗嬋
攝影：夏家朗
這天，記者跟隨熊志權突擊檢查中環三個公廁，第一站是位於大會堂停車場公廁，只是，記者來到公廁門外不禁誠惶誠恐：「博士，公廁影嘢怕唔怕㗎？」熊志權面無懼色，見無人出入，即一個箭步趨前，和清潔阿姐打交道，語氣誠懇道明來意，竟暫准清場，成功達陣。「呢個公廁之前封咗半年大維修，開番幾個月，就七個廁格三個壞，剩四格點會唔排長龍吖！清潔阿姐先慘，你睇個電飯煲？仲要喺度開飯，連個位坐都冇」。身處小廁格仍能靈活走位一眼關七，熊志權邊說邊指手劃腳解釋。
「我哋係民間組織，你話巡公廁，好多時唔單止睇男廁，都想睇埋女廁，通常要搵廁所清潔阿叔或阿嬸開路，清咗場先入，不過都試過出現尷尬場面，有次睇睇吓，突然有女士撞入嚟大叫：呢度係女廁，點解有個男人喺度？我立即道歉，解釋只係代表廁所協會，想睇吓啲公廁設施乾唔乾淨」。
預先通知食環署一定執到靚無料到，突擊檢查最反映現實，但要碰運氣，好在大多有驚無險，熊笑說如一開始大興問罪之師的女士，當一聽到「乾唔乾淨」，一秒間便把他視作「冤情大使」，投訴無水沖廁兼好臭：「真係有需要去公廁嘅人，都一定會有意見，只係人有三急冇得揀，先逼於無奈要用，大家都想有要求呀。」「好似鴨寮街公廁，圍封一年翻新，𠵱家改善咗好多，以前尿兜一半用黑色垃圾袋包住唔用得，用得嗰啲又有煙頭同痰，好恐怖」。使用量高到爆燈的鴨寮街公廁，一度位列「最需改善公廁」前列；同樣位於深水埗北河街公廁，一樣「臭名遠播」，「試過去睇，大卷廁紙塞死，糞便滿瀉，放幾嚿磚喺地下就繼續用，真係好核突」。
公廁企理 大家會錫住用
今日疫潮肆虐，防疫專家都呼籲市民保持廁所衞生，包括定時用稀釋漂白水清潔，倒水入排水口免阻塞，更要時刻緊記先蓋好廁板先冲水，凡此種種，只為與糞便保持安全距離。
只是高高在上的官員，能否理解清潔工為慳錢公廁煲飯，以致為何滿地屎，升斗市民仍得硬着頭皮，自製磚頭獨木橋頗成疑問。個別公廁的衞生問題固然極待改善，就是食環署一度計劃全面使用的空氣清新劑，熊志權一樣有意見：「定時噴防臭，只係將原本的臭味蓋過，為何不找出源頭解決佢？呢種化學原料對臭氧層有害，糞便阿摩尼亞，再加清新劑係好怪味，做好空氣過濾先係治本。」
那些年理大畢業即投身水務工程且一做半世紀，做過水務署然後自立門戶，熊謂由渠道結構到爆糞渠緊急維修，都是他的工作，見慣大場面，無畏無懼「遍地黃金」。
熊志權表示，一般人去公廁速戰速決，但公廁水平高低，其實亦有認可標準，包括舒適、暢通、安全和衞生，英文簡稱就是CASH，符合四大要求，等於位列廁所米芝蓮：「有樣嘢好得意，如果個廁所乾淨企理，使用嘅人基本上係唔忍心整污糟佢，但當好污糟，唔想用但被迫用，就會快用，連沖廁都唔想，係惡性循環，亦好人性，如青嶼幹線嘅公廁就係最好例子，大部份用都是國內同胞，佢哋對公共衞生概念比較差，但你以為一定好污糟咩，原來又唔係，協會試過針對來港內地旅客做問卷調查，佢哋都話好滿意，因為唔想整污糟佢，證明如果廁所本身環境好，得人欣賞，正常係唔會想破壞佢。」
好就越好、差就越差，熊志權說如廁習慣往往反映人性，與文化背景有關，自小接受的衞生教育，亦至為關鍵。「喺日本同新加坡，就算係車站嘅廁所，大部份好乾淨，入到去唔覺得係廁所，好似森林，冇臭味，綠化又做得好，用嘅人自小教育係要有公德心，唔好要其他人幫你執手尾」。大扺都是老生常談，但熊說希望香港公廁，有朝一日亦達到這樣的高水平：「𠵱家唔係冇，不過數量係好少，青嶼幹線、大埔林村嘅公廁，好多盆栽，又空氣流通，要多謝負責清潔嘅人用心去維護。好似林村，每個人如廁出嚟，負責清潔的姐姐都會再打開門，睇吓有冇沖水，如果冲得唔乾淨跟手再沖，公廁清潔都係外判，好唔好同管理有關，唔係乜都批評，如果做得好，值得表揚。」
沙士過後 關注公共衞生
在世界各地搜羅古董絕版馬桶廁板，就連到外國公幹旅遊，廁所仍然是他必遊的景點。熊志權自言出身基層，由農村茅廁到七層大廈的「屎坑」，他都曾是用家。「細個父母務農，用嘅係茅廁，顧名思義就係茅草搭建嘅廁所，下面有個氹，去完，排泄物就會咚一聲跌落去，𠵱家睇係幾核突，有時會見到蟲蟲，務農嘅人唔會嘥嘢，用嚟施肥，細個見到唔會識驚」。小孩嘛，最愛屎尿屁，正是這份好奇，讓他投身行業。
「有啲人覺得講屎講尿好核突，但其實係每個人都要面對嘅日常，我唔怕俾人取笑係逐臭之夫，任何行業都係一種專業，好多人叫我廁所博士，我都唔mind」。那些年，以半工讀方式，在仍未升格做大學的理工學院修讀衞生工程，研究排水系統，其後進修至博士，對於與生活密不可分的廁所，由設計到衞生，他一直事事關心。但觸發他與一眾專家成立「香港廁所協會」的，卻是造成近300死的沙士，那些年，淘大花園是重災區，居民強制隔離，亦因疫情揭露本港大廈排水系統弊端。
「03年沙士係好恐怖，恐怖在每日都有人死，好多人連握手都驚」，那些年，他與世衞人員一齊到淘大花園實地調查，那種瀰漫在空氣中，濃得化不開的集體焦慮，就似今天。「E座嘅排水系統結構，到𠵱家仍係我喺大學教學生嘅教材」。疫潮過後，北京剛好舉辦世界廁所高峯會，討論關於公共衞生及廁所的問題，他就自掏腰包出席，在展場遇上當年主力研究公共設計的理大教授邵健偉，以及現時出任協會秘書長的崔妙瑩。
成立協會 各界交流改革
2001年成立、總部設於新加坡的世界廁所組織（World Toilet Organization），由來自77個國家和地區的國際會員組成，每年都會在不同地方舉行高峯會。「大家之前完全唔識，傾落先知係香港人，約定回港再聚，當時大家有共同目標，希望成立壓力團體，改善香港公廁形象」。沙士一役，一講廁所公共衞生，就必定涉病菌病毒，有成員認識當時醫學界立法會議員勞永樂，邀請加入一拍即合，還成為好朋友。
「佢係好有衝勁嘅人，後來仲做埋第二屆廁所協會會長，嗰段時間好多交流改革，𠵱家大部份市區公廁有個清潔阿叔或阿嬸長駐，都係嗰時開始」。協會成員來自五湖四海，既有醫生，又有大學教授和旅遊業界人士，也有如他一樣從事水務工程的專業人士，協會成立之初四出考察，又大搞公廁選舉和調查，引起不少迴響，可惜其後因為勞永樂醫生患癌，群龍無首，協會的運作亦半停頓。
「勞醫生係我哋大佬，有一段時間佢嘅病情起落好大，我哋陪住佢直到佢離開，當時大家都好唔開心，個會沉寂咗好耐，直至近呢一兩年，大家聚埋話不如做番啲嘢，改善公廁衞生一直都係勞醫生嘅遺志，於是又搵番啲基本成員重組」。物換星移，有人走，也有新成員加入，「有新成員嚟自教育界，提起話細個去公廁，嚇到喊住出番嚟」。這樣的「童年陰影」，熊笑說其實不算太罕有。政府早前公佈的財政預算案，承諾撥款翻新四分之一的公廁，改善情況。
「六億用五年時間翻新240個廁所，即每年要翻新50個廁所，但全港有798個公廁，如全部翻新，需要16年，仲未計翻新完又爛嗰啲，永遠都追唔上」。他苦笑。重組協會後，熊志權說今年的目標是將巡查範圍擴大，希望加設網民評分，增加互動。
此外，他計劃在一年一度的花展設女性尿兜專廁，讓女士試用：「喺歐美，呢種尿兜好普及，尤其大型公眾活動。不過真係要試過先知好唔好，不如我畀個你拎返去試吓」。拿着三角紙尿兜，落力向記者推介，這個達人，何止無廁不歡，簡直充滿使命感。