過年前老友記Po Chung（鍾普洋）請食飯，介紹佢本新書Designed to Win: What Every Business Needs to Know to Go Truly Global，本書講述阿Po與DHL之50年故事。
左丁山與鍾普洋識咗起碼30幾年，起初因為生意相識，後來在1989年六四事件後，一班商界朋友發起一個Right Of Abode Delegation簡稱ROAD，要為香港人爭取居英權，唔記得邊位係倡議人咯，總之籌備咗一輪之後，成員包括鍾普洋、梁智鴻、黎智英、袁天凡、梁伯韜、鄭經翰，潘啟迪、翁江培、林炯熾、左丁山十人，曾上街遊行由維園行到總督府，要求英國給予香港居民居英權。今天香港有不少人攞到英國護照，皆由此而起。
經ROAD一役，左丁山與鍾普洋往來頻密咗，聽佢講過如何從一個主修漁業（Fishery）嘅留學生成為現代速遞界名人嘅發達故事。阿Po與其他創辦股東自從將DHL賣咗畀德國郵政之後，已不問世事，閒時最鍾意繪畫、書法及做慈善工作與教學或演講。佢講過人生有三個階段，第一個階段係一歲至三十歲，學習階段，讀書，學打工，從打工中再學習，三十幾至六十歲係求成階段，如何達至事業成功（俗啲講，發達，英文所謂how to make it），第三個階段係六十歲以後，如何將積累到嘅財富或知識，有意義地使用（how to spend it）。賣咗DHL之後，阿Po當然有大把條件享受人生第三階段，別人也許覺得佢發達容易，其實DHL由小做到大，直至成為跨國集團，被德國郵政睇中，五十年間有不少艱苦奮鬥故事，你估成立一間快遞公司，就會一天發達咩，在華人世界，鍾普洋係速遞（或快遞業）嘅始祖，佢近年用心寫呢本書Designed to Win，算係佢事業之回憶錄，當然值得後來者閱讀、研究、領會。阿普請吃飯之日，左丁山問佢：「有一條問題要你澄清，你當年是否由美國銀行支持、貸款，因而得到發展、壯大機會？」鍾普洋記性非常好：「DHL香港初創時期，美國銀行對我地有好大幫忙，其實係我上美銀搵速遞生意見到聖佐治大廈嘅John Hentz（按：當年之AVP-Operations，AVP在1970年代已經係要職），後來阿John介紹我去見貸款部，好似係由一位Denis負責我地戶口，速遞方面同現金存放，一位Barbara好幫手。」阿Po之言，證實咗美銀在1970年代中培育咗兩間巨企出嚟，一間係DHL，另一間就係Duty Free Shop（其創辦人走上聖佐治大廈借O/D）。難得Po Chung仲記得他人名字，呢招係建立人脈網絡之基礎。