一位經常同英超球星搭上嘅真人騷模特兒Lauryn Goodman，早前聲稱自己懷有一位英超球星嘅骨肉，引嚟唔少人猜測，而佢周日就向英國《太陽報》揭開謎底，稱佢肚入面個囝囝係屬於曼城後衞基爾獲加嘅。
《太陽報》周日引述Lauryn爆料：「我同基爾獲加將會喺四月迎接孩子誕生，而呢個孩子係我哋兩個同之前另一半分開後先出現嘅。」獲加過去一直有個叫Annie Kilner嘅女友，仲幫獲加生咗三個小朋友，但兩人呢排就瀕臨分手，獲加本來已經離開自己同Annie住嘅豪宅，去咗附近租樓自己住，但後尾Annie曾原諒過佢，結果又搬返番去，睇嚟Lauryn爆完料後，佢又要出去租樓，甚至兩人多年關係亦可能玩完。