口罩供不應求，唔少長者要捱更抵夜通宵搶口罩，大家如果旨意港府好似台灣、新加坡或澳門咁幫到手，睇怕同緣木求魚冇咩分別。點知前日777突然感謝國家過去一個月由大陸輸出咗1,700萬個畀香港，但市民明顯冇受惠，唔通口罩收埋晒喺禮賓府？
輸入1,700萬個唔啱數
睇番呢排管治班子嘅發言紀錄，真相似乎隨時衰過篤數！事緣777上個月25號先話自己「親自致函國務院」尋求協助，30號張建宗出嚟自爆話政府只買到500萬個口罩，仲有800萬個由大陸運緊去香港，另外嘅2,400萬個就安排中；而777上星期亦一連兩日公開認口罩短缺同政府採購（包埋內地）「唔係好成功」，所以上周五財經事務及庫務局局長劉怡翔透露，政府雖然訂咗超過4,800萬個口罩，但只得300萬個送到香港，連埋政府庫存量家陣只得約1,200萬個。如果從呢堆數字睇，左計右計加加埋埋，就係計唔出777講嘅1,700萬個點嚟囉。
仲要留意埋，777講明係「過去一個月」，換言之啲口罩係「過去式」，但客觀事實係對市民過去呢兩星期苦況完全冇幫助。計番一個月前，政府先剛剛刊憲將不明肺炎列為須呈報疾病，當時香港仲未搶口罩，777亦未向國務院致函。原來要解決口罩供應問題，唔係靠口罩機，而係要學777咁用部時光機，但其實結果都係解決唔到，難怪市民覺得個政府廢到貼地啦！