張錦程、游學修以及剛獲第26屆香港電影評論學會最佳男演員的劉俊謙，一同演出的同志舞台劇《我們最快樂》，是今屆香港藝術節最受歡迎的節目之一。日前三位「同志」在新蒲崗受訪兼綵排，劉俊謙和游學修赤膊上陣，二人均對自己體形充滿自信，劉俊謙被指「由三歲操到大」，至於有否咀嘴，如何在舞台上表現？他表示「導演風格好形體」，說到底這齣劇由莊梅岩編劇、黃龍斌執導，的確令人引頸以待。
剛獲第26屆香港電影評論學會最佳男演員的31歲劉俊謙，還未回過神來，便要為舞台劇《我們最快樂》綵排。舞台劇演員出身的他，曾憑《天邊外》獲第九屆香港小劇場獎最佳男主角，早前又憑劇集《教束》膺民選視帝，成三料演員。今次他聯同演藝學院的師兄張錦程及師弟游學修，一同演繹同志故事。不過這齣劇今個月14日至16日的場次，因場館關閉已取消，其他場次暫未受影響。
風格好多形體
這劇目是著名編劇莊梅岩的作品，今次跟風格截然不同的導演黃龍斌合作，成為第48屆香港藝術節最受歡迎的節目。早前三人在新蒲崗接受《蘋果》訪問，甫踏入綵排室，全男班的演員正在排練，完全感受到該劇的英文名《We Are Gay》，各人入型入格，可是三人本是「直男」，如何演繹同志？三人不約而同表示沒有擔心過，且非首次，當中以游學修演同志角色達四次之多，連他自己也笑謂：「我問導演同編劇，擔唔擔心我做同性戀者先？演戲都係呃自己先，才希望呃到人。」張錦程則說︰「對我嚟講都係一個軀殼，唔會考慮咁多，都係做個角色，呢幾個人嘅愛同關係。」
當問到會否有咀嘴場面？劉俊謙誠懇地說：「𠵱家排練我哋都會有咀。」張錦程即插嘴說︰「賣個關子先。」游學修也出聲說︰「排嘅時候有，可能做騷時冇呢！」劉俊謙接着說︰「唔會好激烈，導演風格好多形體，親密行為用抽象啲嘅方式嚟表達。」游學修則說︰「其實我哋都有好多sex，唔通台上做愛畀你睇咩？我哋唔係咁形式，只係以另一種表達，導演同編劇想撞啲唔同嘅嘢，搞嘢就冇啦，親暱係有，唔知on show仲有冇。」
除衫交畀拍檔
劉俊謙和游學修還會赤膊上陣，問到二人是否要加緊操弗？游學修興奮說：「真係好，一直都冇人問我，因為角色上我係一個游水教練，又要曬黑，本身自己唔係大隻，本來除衫嘅係交畀阿謙。」在旁的師兄張錦程取笑他說：「佢為咗增啲肌肉，係咁食雞同飲奶粉，成日狂食來補充蛋白質。」游學修笑指劉俊謙太弗，日日爆肌，令他甚有壓力：「佢操番一、兩個禮拜就得，我操咗兩個月啦，健身係好公平，花幾多時間有幾多成績。」
被兩拍檔笑指由三歲操到大的劉俊謙自辯說：「不嬲我係有運動底子，又做好多運動，反而今個劇我冇乜點操，因為冇時間操。」游學修即為自己辯護說︰「就算佢唔操，身形都係咁。」張錦程就搞笑謂︰「你哋睇我操咗幾十年都係咁，所以我冥想，快啲有馬甲線。」三位大男人各自為了操肌，笑料百出。
撰文：羅如文
攝影：陳俊強
