單親媽咪趙哲妤（Uny）眼見因武漢肺炎停課，3歲囡囡趙真羽（小魚）天天呆在家中避疫，於是日前帶小魚到中環的嘉年華耍樂。Uny前日在fb貼相後留言：「有了孩子，人生就是不一樣，天天特別有朝氣，熱熱鬧鬧過生活。」兩母女都有戴口罩出動，不過Uny影相時就脫下口罩唞氣，更錯誤地把口罩拉到下巴位置。
帶齊防疫用品
Uny昨日受訪時說：「小朋友10日冇出街，取消一切拜年活動，一段時間冇同小朋友『放電』。早前預備咗嘉年華VIP門票，噚日開車喺閘外視察，裏面基本上所有活動都冇人排隊，所以就戴口罩、拎酒精搓手液入去。如有人流，我哋絕唔會去。小朋友好耐冇外出，好興奮，跑來跑去，囡囡好聽話，戴口罩同玩完遊戲會捽手。」
玩樂期間，Uny自言有提高警覺：「所有遊戲都係包場先玩，確保冇同其他小朋友或大人近距離接觸。場內冇聽到普通話，應該冇內地人。大部份都戴口罩或手套，只有部份外國職員不設防。」問場內有多少巿民去玩？Uny說：「冇認真數，都應該有幾十人。大部份機動遊戲都冇人玩，玩嗰時都係一、兩個人，但都有啲人擲公仔。」
囡囡非常大膽
Uny透露小魚非常大膽：「佢好鍾意玩機動遊戲，而我就畏高，我陪佢坐摩天輪，上到最高，我唔敢望外面好驚，佢竟然捉住我隻手安慰。」玩完之後10日，她指兩母女會留在家中閉關防疫。
採訪：陳杰