一場逆權運動，令港人睇清楚香港Popo原來可以為所欲為，隨時豪花港人血汗錢升級裝備，之後再用嚟襲擊市民，然後一場抗疫戰，大家再睇清楚極權政府無視醫護界以至港人嘅性命安危，口罩唔夠不在話下，連醫護人員嘅保護裝備都嚴重不足，但政權有理冇理繼續縱容Popo，口罩買唔到，但就繼續幫Popo入貨狂掃裝備。
法國「戰術套裝」每套萬元
朱凱廸噚日就喺fb出post，話武漢肺炎早喺上年12月初已經出現嗰陣，林鄭政府後知後覺，拖到上月底先以「價低者得」方式全球招標想買口罩，錯過咗12月儲醫療物資呢個黃金時間，仲發現原來當時政府原來係忙住幫Popo添置新裝備，其中包括用咗4,000幾萬由法國買入近4,000套「戰術套裝」，即係每套平均成萬蚊，另外又招標買咗2,700個防彈頭盔，用途就係「供應頭部保護裝備予警務人員」。
你以為Popo咁就收手？但實情係之前已經密密手買落大量裝備，朱凱廸翻查上年6月至12月嘅憲報公告，就搵多咗最少六張招標定單，包括有8,000部無線電通話機、爆炸品處理機械人、便攜式反無人機系統同流動電子干擾系統等，連埋啲戰術套裝，埋單大嗱嗱用咗1.32億公帑埋單，繼加班費同膳食費後，又多一條以億元計開支。
八方仲留意到，反送中運動嗰陣傳媒成日用無人機影嘢，而班Popo早就對啲無人機睇唔過眼，今次買嘅新裝備擺明有針對性，恐怕係延續佢哋嘅做事方式，即係搞傳媒打傳媒，總之就係針對傳媒，無他嘅，因為只要冇傳媒影住，佢哋先「做到嘢」嘛！
李八方