昨日講起卡內基之經典名著How to Win Friends and Influence People（1936年出版），係20世紀暢銷書，左丁山讀中學時，在奶路臣街域多利戲院對面嘅舊書攤買到，讀咗幾遍。舊書攤好似有個名，叫做漢榮，賣舊書賣到發達，在奶路臣街開咗一間「漢榮書局」，後來又成為教科書出版商，主持人石國基（第二代）在教科書出版界好出名。
本書入面有好多招數，左丁山唔記得咁多咯，但有一招終身受用，就係記住別人名字（朋友、客戶、同學等等等）。有一位中學同學考完會考就搵到份工，於是唔讀預科考大學咯，入職之後，就讀夜校職業課程，在中環聖約瑟書院上學。一晚，佢在花園道行上山返學之時，碰到老闆行落山，老闆熱切同佢打招呼，問：「Tommy，去邊度呀？」同學答：「蒙生，我去上堂。」蒙生話：「好、好，勤力啲讀。」同學後來對我哋講：「我返工嗰日見咗蒙老闆一次，報上名字，閒談幾句，估唔到佢會記得我個名，好感動！」蒙老闆就是蒙民偉，Tommy以後效忠信興接近四十年，做到Senior Director。蒙生記住「相識」嘅姓名，極好功夫，係佢win friends嘅一項絕招之一。
另一招係對人客氣有禮，餐飲M未退休搞餐飲生意之前，係財務公司總裁，經常出席香港總商會、美國商會之午餐演講會，出席者當然係工商銀行界高層，次次與同枱人士（free seating）互相交換名片，故此收埋好多卡片，但幾十年後佢仍然好記得一位華資銀行高級經理，呢位高級經理每次出現，都主動向同枱人士送上卡片，收回卡片，餐飲M偶然同佢相會，交換名片之後約兩個星期，就收到一張東亞銀行信用卡，嗰位高級經理就係李國寶，用此手法，為東亞增發幾百張信用卡，成本輕微到極，後來李國寶成為東亞主席兼行政總裁，仍沿用呢一招。一位分析師曾在電台兼職，偶然有機會見到李先生，交換名片，李國寶對佢好客氣，一星期後送上東亞白金信用卡，現在呢位分析師已經幾有名氣，仍然記住李生睇起佢，多用東亞卡。李國寶碰上蒙民偉咁又點？高手對高手，李生搵信興做客戶，蒙生話信興代理樂聲牌，與日資銀行往來，但李生唔放棄，一味搵蒙生傾偈，傾傾吓成為老友，東亞做咗信興嘅賓架，蒙生仲入埋東亞董事局㖭！李生在2000年時已是顯赫一時大賓架，邊個唔識，嗰年佢要同孔令成競選做銀行界立法會議員，李生放下身段，逐個選民拜訪，帶埋幫手走去賓架M（現餐飲M）之財務公司拜訪，賓架M大為感動，自然投佢一票。卡內基嘅書人人曉讀，但要真係學到招數兼做得到，要用心機至得。