極端冬季風暴施拉亞，近日從大西洋向歐洲吹襲，帶嚟時速120公里嘅颶風，以及歐洲各地廣泛大雨及雷暴。至截稿前，原定喺禮拜日舉行嘅曼城主場對韋斯咸嘅英超，1場德甲、4場荷甲、3場比甲同英國多場女子聯賽宣佈取消，足智彩有開盤嘅比賽亦宣佈退款處理。其中曼城喺官網發聲明，話極端天氣不斷升級，為保球迷同職員嘅安全，比賽決定延期。另外，原定喺禮拜日作客慕遜加柏嘅德甲球隊科隆，發聲明話佢哋唔會出發，仲話由於唔能夠保證球迷安全離開，所以同慕遜加柏及德甲官方溝通後，決定取消比賽；荷甲官方就話，喺惡劣天氣之下比賽係好唔負責任嘅表現，包括烏德勒支主場對阿積士，同埋阿爾克馬爾主場對飛燕諾等荷甲主要戲碼都要改期再戰。