武漢肺炎家陣衝出國際，肆虐全球，搞到人心惶惶，早前有傳基斯坦奴朗拿度（C朗）都喺自己35歲生日派對上話驚咗呢種新型冠狀病毒，但消息就未經證實，反而熱刺球星迪利阿里就藉呢個病毒嘲諷中國人係病毒源頭，仲有片為證，但最後佢就要發公開聲明道歉。
飛杜拜機場領嘢
英超首次有歇冬，球星趁呢段時間放假周圍去，據講阿里就去杜拜玩，而佢喺Snapchat傳畀朋友而被揭露嘅呢段片，就係出發前喺倫敦希斯路機場拍嘅。片段入面，佢戴住黑色口罩對住鏡頭，而下面就寫住caption：「新型冠狀病毒係乜嘢，請開大你個喇叭聽聽。」然後片段入面聽到嘅，除咗好多雜音外，就有一把男人聲，用緊疑似普通話喺度講電話，然後鏡頭一轉，阿里就偷拍緊呢位亞裔男子，對方梗係唔知自己已經上咗鏡。之後，片段再轉去另一個鏡頭，就係阿里拍住放喺枱上嘅消毒搓手液，然後寫上嘅caption係：「呢個病毒要快過搓手液，先可以捉到我。」
片段曝光後，阿里遭到部份外媒抨擊，表示話咁樣偷拍已經唔尊重，而且唔應該攞呢個已經造成好多人死亡嘅病毒開玩笑，仲涉及種族歧視成份。阿里後尾知衰，除咗刪片外仲發聲明公開道歉：「我好後悔上載呢段片上Snapchat，而且當我知道帶嚟冒犯後，已經立即刪除咗佢。我嘅原意唔係咁，對於受到冒犯嘅人士，我要致以真誠嘅歉意。」
畀內地網民詛咒
阿里約兩星期前仲應熱刺要求，喺微博拍片祝福中國球迷新春快樂，鼠年大吉，同埋為武漢加油，希望中國人可堅強對抗病毒，家陣洩露咗呢段完全口徑不一嘅新片後，就真係好諷刺！以往一有呢啲涉及辱華嘅片段，好似車路士嘅巴西小將羅拔堅尼地，之前外借紐卡素期間隨隊訪中國涉嫌用粗口鬧中國，就畀內地網民狂上佢嘅社交平台鬧爆，搞到佢要公開道歉。對於阿里呢件事，雖然都好多內地網民鬧爆佢腦殘，又詛咒佢「病毒去你家」，但都有人似乎忙緊抗疫，竟話「無暇抵制你」。