代理促銷荃灣海之戀，實用面積531呎海景戶賣898萬，代理奇招吸客，睇樓送口罩十個，成交即送300個。戴咗唔使除返落來喎，唔買，都行埋嚟睇吓！經紀食腦，完勝識條毛叫人檢疫靠自律、聽住追魂電話報到唔死都冇用的廢柴高官。
悲觀者認為口罩與樓價遲早掛鉤的今日，別笑，超市「被架空」、大媽一車推走十條C&S廁紙唔係玩嘢，一個人怎麼拎十卷廁紙走？去7-11買廁紙撲空的林奠幫到手？先獨立調查吓佢個腦，好嗎？
崇拜習總的新加坡這次也小學雞，冒住華春瑩「不厚道」的指控，升級預警，將武肺等同沙士。一令既出，超市大米與廁紙與香港的齊上齊落，被消失！坡民沒跟世衛那位乜春秘書長同一見識，香港人與坡民，信心不存在危機而係真接向權貴打臉，用你們的謊言笠頭示範窒息以謝天下吧。雖然瓜老襯，但罪該萬死的你們不是李文亮，來世投胎，必做每次都被老屈的蝙蝠！
自律檢疫14日淪為星爺搞笑橋段，唔全面封關只有一種任務，就是替大灣區「排洪」！截至8號廣東省確診1034宗單日新增64宗，同一天香港新增一宗共26宗。廣東數字，隨着林奠民望下跌「轉賬過戶」到一關之隔的香港。樓價跌幾多未知，先送口罩，後送龕位就差唔多。施先生諗諗佢。