這樣的新聞，真令人想起英國經典電視節目《踎低噴飯飛行馬戲團》的無厘頭環節：浙江寧波宣佈出現雀局傳播武肺個案，衢州九華鄉非常慎重，為了制止唔聽教的鄉民鋌而走險繼續聚集開枱，鄉政府諗出屎橋一條，逐家逐戶沒收一索，兩日內手頭已有六百幾隻，一一標明來源，計劃疫情告終後物歸原主。消息傳出，我每個略具攻打四方城經驗的朋友都笑到花枝亂顫，「單吊一索有鬼用咩」此起彼落，異口同聲提出可用百搭頂檔，牌照打糊照食對對照碰。連纖纖玉手幾十年沒有碰過這款麻雀仔的我，也記得從前在加州留學，香港書友癮起搵唔齊四隻腳，抽起筒索萬其中一副打三腳麻將，一樣噼噼啪啪盡興至天明，這些由「一罩難求」獲得靈感的話事人，究竟是清純到從未摸過中發白，抑或隻眼開隻眼閉，交差之餘同時為鄉里行方便，真係考起不諳國情的外地人。
閂埋門打衛生麻將這種手部活動，參與者如果是朝對口晚見面的一家人，播毒風險似乎不會高過同檯食飯，風聲鶴唳草木皆兵，咁下一招會唔會不准一齊開餐，每雙筷子抽起一隻？五十步勿笑一百步，收了納稅人血汗錢坐冷氣房的港官其實叻唔到去邊，滿腳牛屎的鄉親起碼憨厚，不像禮賓府主人和她的爪牙黑心歹毒，將港胞條命當政治籌碼。擠牙膏式封關去到這一步，狂瀾已不能挽，仍然在那裏瘋瘋癲癲，問到港府如何執行強制檢疫，食物及衛生局陳姓局長居然答「最緊要受檢疫人士自律」，嘩阿婆，堅離地都有個限度啩，你憑什麼覺得把握最後機會闖關的勇士有自律，入境後會乖乖自我隔離十四天？