Sony Chan（陳茗倫）男兒身女人心，是他，也是她。2015年在法國電視節目中，以廣東話唱出「還願你跟我盡情擔遮扑振英」而爆紅，身在法國心在香港，去年更演出港台劇集《萬輻瑪利亞》，算是轉戰香港電視界第一步。
當然不忘她的老本行，棟篤笑。Sony說，今次回港演出兩場後，順便留港過農曆年，是她1987年移民法國後，第一次在港過年。訪問現場的Sony風姿韻味，冷不防又彈一句抵死金句，毒舌形象有型有格。
一直以「香港人」身份自豪，Sony更以「港女」自居，「我係好港女㗎！我好鍾意香港人有嗰句講嗰句，我哋講嘢一針見血，我諗係港人嘅特質囉！」遊走法港兩地，面對此時此刻的香港地，Sony 說，身處逆境都要保持優雅。
邊吃着雞批邊弄頭髮的Sony說：「我隨時可以埋位！」記者叫她慢慢食埋件雞批才拍攝也未遲，她立即起身：「我得㗎喇，快啲快啲，唔好阻大家收工！」她最愛的偶像，嘟姐上身了。
撰文：文嘉龍
攝影：何穎賢
香港人講笑唔使兜圈
最愛嘟姐鄭裕玲的Sony，說話語氣和神態的確有幾分偶像影子。她說，不少粉絲說她像朱玲玲，但有不少說她更像鄧兆尊！港女式自嘲，Sony是高手。前年首度在港演出棟篤笑，八場爆滿，今次兩場的《香港小姐與法國佳麗》，一樣秒殺。Sony說，用自己母語廣東話演出，最有感情。
「以前（棟篤笑）用法文，用法文我知道個反應係點，我知道可以點樣handle個語言，用母語我就唔知得唔得，原來我用母語係好過用法文做，我覺得直接啲，大家係自己人，變咗我同香港人講笑，我唔會兜咁多圈囉，我會好直接，譬如有個觀眾我覺得好笑，我要『扳』我就『扳』落去，但係我對住法國人，我始終都係一個移民，佢畀咗一個passport我，我都要『鏡』住，我會兜個大圈嚟『扳』佢囉！」
同聲同氣，事無不可對人言。「你明唔明呀，大家都係自己人，大家都係香港人。一個白人望住我，無論我有冇佢passport，我都係一個外國人囉，所以唔同！」法港大不同，Sony說：「我自己最掛住其實係香港人，人與人之間有一個好warm嘅感覺，你喺街上面，譬如我問路，我覺得好守望相助嘅，但喺歐洲呢，尤其巴黎人，係比較individualism（個人主義），自己淨係理自己嘢，即係我唔干涉你，你又唔好煩我，大家唔同意見、唔同宗教唔同政治亦都OK，總之就係你唔好理我，我又唔好理你咁囉！」
不過這位「香港人」Sony就不會愛理不理。過去大半年，Sony在網上不時為香港人打氣，尤其是年輕人。對於香港的抗爭運動，Sony說：「我覺得係健康嘅，我覺得社會任何一笪地方都好啦，大家應該將自己嘅意願講出嚟，大家respect唔同嘅聲音，我覺得係一件好事！」
畢竟早在回歸前十年，1987年Sony已經移民法國，當年今日，香港變得很陌生？「嗱，我嗰陣時呢，係連手提電話都冇嘅嗰個年代，你係咪願意返番去嗰個年代吖？我真係唔知道！當然每個人年紀大咗就好鍾意懷緬過去，但係一個冇手提電話嘅時代，係咪真係好過𠵱家呢？我又覺得未必囉，每個人都會覺得佢年輕嘅時候係最開心最燦爛嘅！」
《阮玲玉》我睇咗十次
年輕時代的Sony，最愛留意香港娛樂圈，她說自己是一個80年代的結晶品，「我好留意香港娛樂圈㗎！我所有嘅reference都係（來自）香港明星，外國嗰啲明星我係咁意參考吓㗎咋，我唔係好看在眼內！好好笑，我嗰時每日做電台節目，每日都會有一個明星係嘉賓，有陣時我哋成台電台啲人都慌失失喎，今日有乜大明星做嘉賓，我冇感覺喎！我話乜大明星呀？周潤發呀？唔係呀，咁又慳啲啦！係㗎，所以我真係一個80年代濃縮嘅一個結晶品，有陣時我有啲followers話，Sony我真係覺得你好好笑呀，你講嘢呢，我覺得你啲字眼好似我auntie呀，即係我停留咗喺嗰個年代囉！」
Sony常說鄭裕玲是她的啟蒙老師，港產片最愛是《阮玲玉》，她專向女明星埋手。「我好鍾意睇嘟姐，我諗做喜劇，嘟姐認第二都冇人敢認第一，嗰個節奏呀各樣嘢，真係一個啟蒙老師，我睇佢嘅電影已經學咗好多嘢囉！另外我又好鍾意導演關錦鵬嘅戲，好似《阮玲玉》呢齣電影，我諗我睇咗十次囉！（想做張曼玉？）我自問冇咁嘅氣質，我覺得都係做返適合自己氣質嘅嘢，唔可以抄任何人！」
恨做明星自細發明星夢，Sony最想參加的是《香港小姐》，奈何先天性問題只得作罷，後備熱門是夢想參加《新秀》。「首先係想參加《香港小姐》先嘅，點知唔係好啱啲criteria（標準）啦吓，咁就想參加《新秀》，嗰時新秀好巴閉，讀完晒中學就諗住返嚟參加《新秀》，點知屋企人就覺得要讀大學，咁我又冇乜反對，咁好啦，讀大學囉咁！」
打算唱那首歌參賽？「我呢啲腔都係小鳳姐㗎啦！（唱《風的季節》？）咁又唔敢，都有啲咁猛嘅人（梅艷芳參選歌曲）唱過，我唱啲冷門啲囉，或者係一啲男仔歌我都會唱，黎明嗰啲！」
Sony生於小康之家，成長於西灣河，父親做小生意，不過早年在港事業出了狀況，剛巧有朋友在法國經營中餐館，父母在1987年也決定移民到法國重新開始，那年Sony才剛小學畢業。
問Sony，父母是否支持她做任何決定？「梗係唔係啦！譬如我食碗魚蛋粉太多辣椒醬，佢哋都唔鍾意啦！父母就一定係over protect啲小朋友，但係我好具體畀佢哋見到我每一次做嘅嘢，都係諗過晒前因後果，譬如我入娛樂圈，其實我之前都係建築師，建築系畢業啦，亦都做過建築，跟住又做過fashion，自己係有少少積蓄我先至踏入娛樂圈！佢哋（父母）見到呢個人都係有啲責任感，自己所有嘅decision都可以孭返個鑊，屋企人就會放心囉！」
啲皺紋唔好咁快出嚟
Sony的外公是作風西化的南洋華僑，「我哋係typical香港中等階層，媽媽冇做嘢喺屋企湊仔，爸爸就打工，三代同堂，同我公公一齊住。我細個我阿公、我阿哥同埋我，三個人一間房，好開心！我公公係南洋華僑，所以佢嘅性情都係好西化，細細個佢已經教我講英文，食完飯會推開晒啲枱枱凳凳，開音樂要大家跳舞，所以我覺得我屋企係幾carefree（無憂無慮）！」
大學讀建築的Sony，畢業後當上建築師，之後為興趣做時裝買手而與法國傳媒圈子熟絡起來，到了2009年在小型場地演出棟篤笑大受歡迎，終成為法國電視台、電台界的主持紅人。娛樂事業五光十色，Sony的愛情世界反而平淡，與她的法籍大廚男友已拍拖19年。
「悶到癲㗎喇，係好悶㗎！（點樣相識？）好簡單，大家係鄰居，住咗冇耐嘅一個樓上鄰居，但係我住咗一陣我就想搬，佢見到我就嚟搬，佢就同我表態，我又心諗，橫掂都冇人吼，試吓啦，一試就試咗19年喇！」打算結婚嗎？「我以為你話有冇打算散呀？哈哈！冇呀，結婚其實好多人都係為咗條裙，我登台都着過啦，唔使喇！（唔想着婚紗？）你落街買嘢你都可以着㗎啦，唔使啦！」
Sony說自己私底下又悶又平凡，「我本身個人好悶，其實好多藝人都係咁，舞台上就hyper，一落咗台就一條悶棍！我一唔做嘢呢，我鍾意靜靜地喺屋企畫吓畫，攞啲公仔出嚟換吓衫整吓衫，我男朋友就喺旁邊打機，跟住開包薯片一人食塊，望都唔望吓對方，唔需要講嘢，但係都好似有一個protection！你知啦，尤其娛樂圈，有好多嘢每日都喺度變，同時間有一個好平凡又可以話係好悶嘅生活，其實係一個好好嘅balance！」
45歲中女之齡，但求每日皺紋不要跑出來已經滿足，「我今年都45歲啦，譬如好多時好似公司話，我哋今年要捧你，你諗到點樣天花龍鳳，畀你prime time（黃金時間）星期六，你以為發達啦，但係原來有好多外來因素，你個節目唔收得喎，所以我𠵱家唔會再咁樣plan，總之我會揀一啲我覺得係有意思嘅project，我就覺得心滿意足，我工作同私生活係協調，啲皺紋唔好咁快出嚟，我已經好開心！」
港女教條仲有一則，「我話係就係！」Sony又嘟姐上身：「譬如我𠵱家同你講，我係全世界最靚嗰個人，你話唔係啫，我話係，你話係就係㗎喇！即係我話我係香港人呀，我唔會理任何人係咪approve，我話我係香港人，我就係香港人！」
【後記】24吋半
記者叫Sony用她的小鳳姐腔唱幾句拿手飲歌，「以前有個日本劇集《阿信的故事》，主題曲我都好鍾意，你撩我就唱少少啦，『命運是對手永不低頭……』」好80年代feel！
拍照時Sony說，影相時要做周慧敏、演戲就要做鄭裕玲。現場所見，她的身形也和嘟姐一樣keep得甚弗，Sony卻說小時候是個肥仔，長大才慢慢修身，由38歲保持身形至今。多年保持每天只食一餐，問她腰圍多少？「25吋！肥咗喇，之前24吋半㗎！」
港女特質，半吋都要同你計盡！
場地提供：ULURU