以前每個星期都在馬場見到嘅朋友史提芬，呢幾年不見出現，唔知走咗去邊，點知年初一就收到佢嘅賀年短訊，突然醒起，史提芬在2003年期間入口大量口罩做批發，今年仲有冇做呢？於是回覆祝佢四季平安，身壯力健之餘，順便一問：「仲有冇入口口罩？」史提芬火速回覆：「有呀！送你一盒。」乜咁少呀，沙士之時，佢話要送口罩畀左丁山，要幾多都得，但當年供應冇咁緊張，左丁山唔要，現時環境不同，想同佢買一箱㖭，送就冇謂嘞！但史提芬素來大方，今次話送一盒，顯然係來貨有限之故。幾日後，史提芬果然送咗十個口罩嚟，韓國貨，多謝晒。但追問佢有幾多貨可以賣畀左丁山，價錢幾多，至今未有回覆，可知今時今日，輸入口罩嘅商人亦有為難之處。
呢一輪唔戴口罩出街，會畀人視為異類，左丁山有一晚返屋企，等𨋢之時，隔籬有五六位街坊，𨋢到嘞，只有左丁山一人行入升降機，其他人唔郁，望住左丁山一個人閂𨋢門，初時覺得奇怪，後來一諗，嗰幾位街坊全部戴口罩，佢哋驚咗冇口罩嗰位住客──即是左丁山。
我哋特首林鄭就係堅離地嘅典範，年初十（2月3日）傍晚開記者招待會，局長戴口罩，林鄭唔戴，有人話佢受不住CNN諷刺佢舊年引用緊急法訂立蒙面法，今年不得不戴口罩示眾，於是索性唔戴，頗有「雞珍」陳馮富珍（衞生署署長）在沙士發生初期食雞畀市民睇之作風。喂，你大姐唔戴箒，第二日（2月4日）開行政會議之前見記者，佢竟然公開透露公務員如非必要，不准戴口罩，戴咗都要除，公務員當然群起反對嘞。林鄭高高在上，住在禮賓府，返政府總部有公家車坐，一定唔會聞到中環污氣，唔戴口罩幾合理，包保冇事。但好多公務員係文員做後勤工作，住在居屋、公屋、舊樓，日日逼地鐵返工，唔准佢哋戴口罩，儍嘅咩，或曰公務員返工放工時間可自便，返到寫字樓就唔准戴（即係話公務員辦公室一定冇口罩供應）。公務員條氣都係頂住嘅箒。有心人大可將林鄭大小姐之堅離地行為彙集分類，集結成書，待今年書展（如果開得成嘅話）推出，包保好賣，書名大贈送，就叫做How to Annoy Friends and Alienate People，抄自二十世紀暢銷書Dale Carnegie原著，1936年出版之How to Win Friends and Influence People。新書最好加插漫畫，由尊子或馬龍執筆更妙。不少文化人鬧林鄭鬧得多，不如利用佢之另類思維來賺吓錢。