現年28歲的駱胤鳴去年傳因政治表態而不獲無綫續約，她坦言從不後悔，亦不想再深究「死因」，更認為離開絕不是一條死路。雖然前途未明，但幸得拍拖5年的男友Kelvin默默支持，兩小口子在亂世中更決定年底結婚，互相扶持走下去。
駱胤鳴跟拍拖5年的男友Kelvin決定在年底結婚，這對準新人日前接受《蘋果》訪問，並一同整心形蛋糕預祝周五的情人節。不少香港人因冇樓不敢結婚，加上現今社會狀況前景不明，但駱胤鳴和Kelvin剛好相反，Kelvin說：「當運動開始後都有諗過，但其實兩個人嘅關係應該喺乜環境都行落去，大家點樣互相扶持。」
5年計劃
兩人需靠家人幫助才有自己的小天地，駱胤鳴表示：「媽咪有地方可以畀我哋住，靠母幹，我哋一邊住一邊抽居屋。」Kelvin婚後會積極儲錢，但能否儲夠首期仍是未知數：「希望5年後夠，到時啲錢一係畀首期一係做生意。」兩人暫時沒有生育計劃，Kelvin希望幫助被遺棄的小動物，駱胤鳴甚至有領養小朋友的念頭。是否受香港環境影響不想生B？Kelvin直認：「香港競爭好大，想像唔到生小朋友出嚟要畀幾多嘢先合乎競爭條件，我真係冇信心，加上又唔想有養兒防老嘅心態，唔想將呢個壓力畀咗小朋友，所以𠵱家真係冇諗過生。」
駱胤鳴早前不獲無綫續約，有傳因她曾表達政見，她說：「傳係咁傳，官方答案係縮減人手，好多人唔係因政見都唔被續約，麥美恩話齋人哋都幫我揀咗呢條路，惟有順其自然，咁唔代表呢條係死路。」會否後悔曾政治表態？駱胤鳴用堅定口吻說：「冇，我從來唔為自己做過嘅嘢後悔。」Kelvin曾在新城做DJ、在無綫撰稿，現為記者，當年在無綫任職一年便離開，是否跟公司作風有關？他說：「我當時望住上司，問自己20年後我可能都就係咁咋喎，咁啱當時有第二個offer，好玩又多新嘗試，所以決定走。」
唔會餓死
女友「被離開」，Kelvin會否面對經濟壓力？他說：「我哋唔可以話好好環境，但唔會餓死。我好支持佢離開TVB，好耐之前已同佢講應該要離開。我唔覺得佢會有一個好發展，觀察一個人喺一個地方，會知個地方啱唔啱佢，佢性格一定唔係好適合TVB。」最後Kelvin叫駱胤鳴去學寵物美容，賺錢支持她繼續唱歌。
採訪：寶妮
攝影：陳俊強
場地提供：Cake Story