好多女藝人都係屋企經濟支柱，小朋友仲細，所以拍劇、電影、內地綜藝節目乜都要接。早前QQ媽接咗部合拍劇，都係嗰啲輕輕鬆鬆、談談情說說愛嘅劇情，但姐匙聽幕後人員講，QQ媽拍完睇番就相當唔滿意，因為燈光打得差，搞到啲皺紋出晒嚟，真係女人大忌，而且同佢做對手戲嘅男演員，係細自己一截，拍埋就更加顯老。再加上導演唔掂，令劇集節奏緩慢，QQ媽即時向製作單位投訴，要求已經拍好嘅五集全部唔要，搞到公司上上下下都好頭痕。因為除咗要同其他演員夾期再拍，重拍要用多好多錢，都係一個好重要嘅問題。
但以QQ媽嘅江湖地位，再加上係劇中嘅靈魂人物，佢話唔拍，大家都係企咗喺度，經過商議後，公司最後都要跪低。雖然冇再補拍之前嘅片段，但就將全部幕後班底換晒，包括導演、燈光、劇務等，為求令QQ媽舒一口氣，拍攝嘅soft鏡頭加強咗，QQ媽睇唔到自己臉上皺紋，心情好咗，演出自然得心應手。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。