【貝沙灣】男子組合天堂鳥（BOP）的成員葉灝基（Gordon）跟同門組合BINGO成員關嘉敏（Carman），日前下午4時許到貝沙灣拍拖放狗，二人更攝影師上身，輪流為Gordon的愛犬「豬姻」影相，身穿衞衣兼騷長腿的Carman，更一度忘形地踎地操刀拍攝，不慎露出打底褲。之後兩人走到近海皮的靜悄位，自成一角玩自拍，Carman還幫Gordon撥頭髮整靚樣，十分體貼。兩人談完一輪心後離去，當步出公園時，因為鞋子黐滿泥沙，Gordon抹乾淨波鞋後，又用消毒紙巾幫女友拭手，接着他們前往超市入貨，買了日用品和食物，然後齊齊回到西環愛巢。
斷正急急截的
晚上8時許，Carman單拖落樓，記者上前問兩人拍拖多久？她一臉茫然，回答：「唔好意思，其實仲有朋友，不過放咗飛機。」問到二人一起回家，是玩煮飯仔還是見家長？她支吾以對：「其實上面仲有朋友喺度。」至於覺得Gordon為人如何，有沒有發展空間？她說：「佢幾好，我哋係朋友，唔該晒。」說畢即上的士匆匆離去。
讚Gordon好Man
其實兩人自去年成為同門後，已分別合作拍攝網絡電影《穿越愛情綫》，其後再合唱歌曲《NOW》及拍攝MV，一起又唱又跳，Carman當時受訪已透露外間大讚她們合襯：「Gordon就好Man，而我啲舞就女性化少少，啲人就覺得我哋好襯，我就覺得第一次合作跳舞都係麻麻，但我啲朋友就話好睇，叫我哋多啲合作。」
採訪、攝影：吳耀輝、孔志豪