「這是最好的時候，也是最壞的時候。這是智慧的時代，也是愚笨的時代。」~ 這四句出自查爾士狄更斯「雙城記」的名句，用來形容現在的處境真是相當貼切啊！大夫這篇文章是2月2日寫的。天呀！天寒地凍，成千上萬人排隊買口罩，等等等等，等到變雪條！新聞中出現一位老伯，凌晨四點半出來排隊，一直等到早上十時等店舖開門，為的只是一盒口罩，希望能在病毒肆虐下生存下來。
大夫亦係Facebook睇到有不良分子涉嫌將市民用過嘅口罩循環再賣返出嚟！所以大家如果見到些不明來歷嘅口罩要小心提防呀！
至於有朋友問大夫「用過啲口罩可不可以翻蒸消毒，再加啲雞粉加啲魚露」呢個問題，報章上已經有很多口罩權威回答過，大家要知道，加熱會破壞口罩的保護性喔！
話說放工後，大夫又要周圍繼續為日常生活同屋企人嘅安全撲口罩。就喺大夫周圍撲消毒酒精同消毒用品嘅時候，發現超級市場啲米所剩無幾。雖然大夫都好鍾意睇金庸嘅神鵰俠侶，但係希望遲啲大夫同家人都唔使學小龍女，食蜂蜜飲露水啦。
情緒低落之際，亦發覺人間有情！大夫作為一個貼地嘅香港人，當然亦同其他港人一樣盡力喺Facebook上面撲口罩，竟然有素未謀面嘅朋友私訊大夫話如果有緊急需要，佢可以讓啲口罩畀我。同時間亦收到好多好朋友嘅問候話，有需要嘅話佢哋都可以畀啲口罩我。大夫感到十分安慰，在此特意感激大家。
同時，大夫亦十分感激一些良心店舖，在危急關頭，能與港人共度難關！雖然未能在此公開店名表揚，但希望你哋知道我係講緊你哋！你哋對香港人同醫護人員嘅關心，大家一定會銘記於心，多謝晒。
其實𠵱家全世界都口罩短缺，香港不如自己開多幾條生產線專門做口罩畀大家用，用唔晒仲可以輸出國外賺外匯，誓要將香港變成：「世界口罩生產之都」！
WIN WIN㗎……政府開心，大家又安樂笑呵呵，真係值得認真研究㗎。
林煒 精神科專科醫生
想輕輕鬆鬆健康啲，記住留意健康蘋台
http://health.appledaily.com.hk/