武漢肺炎殺入香港，人心惶惶，但特區政府一直幫倒忙，香港人呢排經常疲於奔命四圍搶嘢，先係搶購口罩，之後向糧食出手，最後連日用品都成為目標。有網民就有驚天發現，言之鑿鑿指原來每次777開完抗疫記者會，就會引發一輪搶購潮，仲叫大家估吓777下次開完記招後，大家又會搶啲乜。
689加把嘴
八方fact check過，777上月28日出嚟開記者會，宣佈只封最低使用量幾個口岸後，當時市面有口罩荒，但翌日先出現搶購潮，店舖賣晒後仲被大媽大叔包圍。上星期五777再出嚟，仍然唔肯封關，大家知道搶口罩無望，可能擔心疫症喺社區爆發出唔到街，咪改為儲糧食，結果超市米架空空如也。如是者，之後再向其他副食品出發，搞到即食麵同罐頭被掃清光。至於最新一輪搶購潮，又真係喺777前日開完記招後當晚出現，緣起就係流傳廁紙即將斷貨。
究竟777同搶購潮有冇關係？鍵戰政治閒人689就有權威判斷，前日佢話政府一宣佈收緊出入境限制，就有人搶廁紙，質疑如果政府接受醫護界全面封關要求，「市面會亂到甚麼程度？」即係連689都認為搶廁紙係由政府引發啦！八方好肯定，香港人見到777咁抗疫法，好難唔撲定物資，因為唯一出路只有自救囉。
李八方