全球鬧口罩荒，特區政府嘅應對方法，就係繼續出標書叫口罩廠投標，仲要價低者得，當然係食白果亦遠水救唔到近火啦，難為777前日喺記者會，仲厚顏讚港府做得好，話「I don't want to particularly describe how well my government has been doing」（我唔想特別講我個政府表現點好啦），八方當下以為自己聽錯。
連口罩供應都搞唔掂，究竟777哪來的自信？唔通覺得背後有國家全力支持？八方醒起！時為上月25號，香港市民開始唔夠口罩用，777好有信心咁話，已經親自致函國務院，希望相關單位提供所需協助，試圖令大家安心。事隔接近兩星期，究竟啲協助嚟到未？八方親自致函問過特首辦，究竟國務院有冇回覆777、對方會點協助等，結果一直音訊全無，難道777同八方一樣，都係等唔到答案？