熱刺又過一關！禮拜三英足盃重賽，熱刺繼第三圈之後又要重賽，但今次主場靠盧卡斯莫拉同孫興民尾段各建一功，以3:2驚險反勝修咸頓晉級16強。今仗臨尾射入12碼幫球隊反先嘅老孫再做救世主，最近四仗場場有波入之餘，仲靠呢個入波成為近四季喺英足盃入波最多嘅球員，認真威水。
上圈要靠重賽先淘汰米堡，今圈熱刺又要重賽。球隊喺周日同曼城火併之後，疲兵上陣下雖然靠修咸頓中堅積克史堤芬斯擺烏龍領先，不過之後就全程捱打，34分鐘「聖人」前鋒列特文射門被撲出之後，沙恩朗執雞成功追平，下半場修咸頓繼續攻，終於喺72分鐘靠大勇嘅丹尼艾格斯射入反先。好在熱刺及時回勇，先靠盧卡斯莫拉喺78分鐘妙射得手，再喺87分鐘有孫興民禁區內被修頓門將安格斯根恩拉跌，球證直指12碼點，老孫操刀一射中鵠，幫球隊反勝晉級。
頻頻入波頂替卡尼
據統計網站Opta嘅數據，熱刺近11次英足盃要踢重賽嘅話，全部都成功贏波晉級，可以話係重賽之王。再次救全家嘅老孫，自從哈利卡尼要長唞後就成為熱刺嘅主力得分手，各項賽事近四仗場場有波入，今季各項賽事已經為球隊入咗14球。如果由16/17球季計起嘅話，老孫英足盃上陣17場就入咗11球，係近四季英足盃入波最多嘅球員，隨住球隊繼續晉級，呢個紀錄仲大有可能破落去。
寸王罕有大讚對手
賽後一向寸開嘅熱刺領隊摩連奴就反而先讚對手修咸頓︰「必須承認，對手真係好出色，但我哋應該係贏嘅嗰隊，因為我哋展示咗好強嘅決心。」16強抽籤之後，熱刺就抽中對英超嘅諾域治，最矚目一戰就莫過於車路士大戰利物浦，曼聯就作客有朗尼倒戈嘅打比郡，衞冕曼城就會作客英冠嘅錫周三。
英超Big 6全部未出局都算係近年少見，紅軍喺英超玩晒，其餘Big 5梗係乜盃都要去爭吓。