沙士時期警世恆言，肯定非A1董太發出的「千祈千祈千祈！洗手洗手洗手！」莫屬，武漢肺炎雖然方興未艾，還不知道往後有什麼膾炙人口金句，但遺臭萬年榜上，林鄭限制爪牙戴口罩的「我根本係叫佢哋唔准戴，戴咗都要即刻除返落嚟」，無論如何會佔最重要一席位。邏輯之反科學、語氣之西太后，已經令人不停嘔白泡，還要加插按捺不住的「哈哈」，鴛鴦眼邪惡四射，接地氣的風土人情研究員，馬上想起TVB已故長壽綜藝節目《歡樂今宵》那首主題曲──改編西曲，原名《Enjoy Yourself (It's Later Than You Think)》，奉勸世人行樂及時，因為有「比你想像遲」的惘惘威脅，此婦的精神狀態，不但sicker than you think，而且crazier than you think，真係有佢咁病冇佢咁癲，香港得到這種飛越瘋人院質素的地方官領軍，難怪黃大仙也移民。
前兩日湖北省紅十字會副會長張欽被炒魷，報導引述習近平二月三號中共政治局會議發言，「對黨中央決策部署貫徹落實不力的，對不服從統一指揮和調度、本位主義的，對不敢擔當、作風飄浮、推諉扯皮的，除追究直接責任人的責任外，情節嚴重的還要對黨政主要領導問責」，簡直條條罪狀通林鄭。咪以為山高皇帝遠，趁習主席忙到一頭煙就可以為非作歹啊吓，車公話齋「天眼恢恢疏不漏」，一言九鼎的習主席絕對唔會掛一漏萬，口罩戴咗固然可以除返落嚟，特區行政長官的頭銜亦收得返㗎吓。