周二英足盃第四圈重賽，利物浦主場迎戰英甲梳士貝利，領隊高普早已事先張揚，一隊球員全部放假，自己亦唔會督師，結果排出刷新球會隊史最年輕平均年齡嘅正選陣容，有驚無險下以1:0小勝過關。今場隊長居迪斯鍾斯，更打破保持咗120年嘅紀錄，成為紅軍最年幼隊長。
由於利物浦已進入英超歇冬，全部一隊球員都已經開始休假，紅軍今場講明只派一班年青球員應戰，U23教練基列治尼就暫代領隊職務。一隊老將占士米拿雖然冇出國唞吓，但今場同樣冇上陣，只係負責做啦啦隊，同班師弟做賽前訓話激勵吓士氣咁。
靠烏龍球晉級鬥車仔
利物浦今場正選陣容平均年齡只有19歲又102日，當中仲有7位正選未夠20歲，其中年紀最細嘅係16歲嘅哈維艾利洛；而年紀最大嘅都只係22歲嘅捷利維拿，打破咗球會喺上年12月英聯盃8強排出嘅19歲又182日紀錄，成為利物浦史上最年輕嘅正選陣容。
不過呢班小紅軍今場踢起嚟並唔失禮，半場同梳士貝利踢成0:0平手。雖然客軍喺58分鐘有沙恩獲利近門頂入，不過球證翻睇VAR之後判定越位在先入球無效。直到75分鐘，利物浦嘅尼高威廉斯攔截咗梳士貝利門將麥斯奧拉利嘅傳送後長傳，客軍後衞路桑威廉斯打算頭槌解圍嗰陣竟然頂咗個波入網，最終紅軍就以呢個烏龍波以1:0擊敗梳士貝利晉級，下一輪16強賽事將會喺3月初硬撼車路士。
鍾斯成為最年輕隊長
紅軍一班後生仔今場擊敗年紀大一截嘅梳士貝利固然威水，隊中個別球員仲打破咗球會嘅百年紀錄㖭，就好似今場擔任隊長嘅居迪斯鍾斯就以19歲又5日成為咗利物浦史上最年輕隊長，打破咗拉斯貝克喺1900年創造嘅20歲又250日紀錄。居迪斯鍾斯賽後就喺Twitter貼文同大家分享佢嘅興奮心情：「成為利物浦歷來最年輕嘅隊長令我夢想成真，感覺難以置信，我非常期待下一輪比賽。」
代任領隊基列治尼就透露，高普都非常滿意一班年輕球員嘅表現：「高普賽前畀咗一啲意見同支持我哋，佢半場同完場後都有傳訊息畀我哋，對球隊表現好滿意，仲話有1、2位球員有機會喺下一圈繼續上陣。」希望呢班紅軍明日之星可以好好把握上位機會喇！