一個工會，唔肯公開撐打工仔罷工，係咩玩法？作為香港最大工會嘅工聯會，噚日拉大隊去政總外示威，叫前日已公開「投降」、表明難以搵到足夠口罩嘅林鄭政府，向長者派口罩。但一被問到係咪支持醫護界罷工嗰陣，發動遊行嘅工聯會議員麥美娟就點都唔肯正面回應，只係話該會感謝堅守崗位嘅醫護人員，希望政府向佢哋提供支援。
至於係咪支持全面封關，麥美娟同樣冇正面回應，只係話政府應按疫情發展，採取任何果斷同嚴厲嘅出入境措施。
伯伯路見不平
麥美娟受訪嗰陣，有一位喺政總聲援醫護界罷工嘅伯伯，就對工聯會拒撐醫護界罷工相當扯火，力斥工聯會作為工會竟企喺工人對立面，冇支持過醫護罷工，一度高聲力斥麥美娟等人「出賣香港人」，結果被在場戴晒口罩嘅軍裝警員上前拉開。