舊年元朗721恐襲前一日，《經濟日報》前副社長石鏡泉公開發表咗「打仔論」，煽動藍絲買藤條、水喉通對付示威者。石鏡泉喺7月23日辭任經濟執董、副社長，連喺《經濟》嘅專欄都被cut。
大讚解放軍防疫有功
當大眾焦點由抗暴轉到抗疫，石鏡泉亦喺上星期靜靜雞復出寫專欄，題材主要談及新肺炎嘅擴散，當中亦講到一啲防疫湯水。噚日最新嘅一篇就繼續講疫情，而寫作風格一如以往，佢過往多次被發現抄自己、抄人哋嘅專欄，更出過一篇文章《抄也要抄得精明》回應。今次大作，照抄一篇「來自朋友收到武漢的朋友」嘅帖文，大力讚揚解放軍入城防疫，當中包括解放軍醫療服務，佔全文三分二內容。
到文尾兩段，先至以小段篇幅藉技術分析講疫情，指「新增疑似個案似呈個5浪走勢」，又話如果日後新增疑似個案減少，喺波浪理論上就屬於發病高𥧌期過。整篇文章嘅高潮，係佢呼籲市民要信政府，「防疫就是要聽政府指揮，個人自由意志，先擺埋一邊。」同早前喺鏡頭前高呼「有政府，唔怕」嘅大媽們相輝映。
李八方